جہلم: ڈسٹرکٹ ہیڈکواٹر اسپتال جہلم کے شعبہ اطفال کے سربراہ ڈاکٹر چوہدری نعیم غفار نے کہا ہے کہ موسمی تبدیلیوں کے باعث حفاظتی تدابیر نہ اپنانے سے بچوں اور بڑوں کی صحت شدید متاثر ہو رہی ہے۔ سانس اور گلے کی بیماریوں میں مبتلا مریضوں کی تعداد میں مسلسل اضافہ ہو رہا ہے، جو احتیاطی تدابیر کو نظرانداز کرنے کا نتیجہ ہے۔
انہوں نے یہ بات جہلم پریس کلب میں صحافیوں سے خصوصی گفتگو کے دوران کہی۔ ڈاکٹر نعیم غفار نے شہریوں کو خبردار کیا ہے کہ اگر انہوں نے اپنی صحت کے تحفظ کے لیے فوری اقدامات نہ کیے تو بیماریوں کے پیچیدہ مراحل سے گزرنے کے امکانات مزید بڑھ سکتے ہیں۔
ڈاکٹر نعیم غفار نے کہا کہ فضائی آلودگی معاشرتی کوتاہیوں کا نتیجہ ہے اور جب تک ماحولیاتی تحفظ کے لیے بھرپور اقدامات نہیں کیے جاتے، اس میں کمی ممکن نہیں۔ ان کا کہنا تھا کہ ماحولیاتی آلودگی کے خاتمے اور بیماریوں سے بچاؤ کے لیے ہمیں مشترکہ طور پر کام کرنا ہوگا تاکہ صحت مند معاشرہ تشکیل دیا جا سکے۔
ڈاکٹر نعیم غفار نے عوام سے اپیل کی کہ حفاظتی تدابیر کو سنجیدگی سے اپنائیں تاکہ بیماریوں کے پھیلاؤ کو روکا جا سکے اور صحت مند زندگی کو یقینی بنایا جا سکے۔
