جہلم: ملک بھر کی طرح ڈسٹرکٹ جیل جہلم میں بھی جشن آزادی ایک باوقار تقریب کا اہتمام کیا گیا۔
جیل کی عمارت کو گزشتہ شب سے ہی برقی قمقموں سے روشن کیا گیا اور تمام جیل کو جھنڈیوں سے سجایا گیا۔ صبح کا آغاز نماز فجر کے بعد قرآن خوانی سے کیا گیا اور ملکی سلامتی اور ترقی کی دعا کی گئی۔ اس کے بعد صبح نو بجے پر چم کشائی کی تقریب ہوئی۔
یوم آزادی کے موقع پر ڈپٹی کمشنر جہلم سیدہ رملہ علی نے ڈسٹرکٹ جیل جہلم کا دورہ کیا ، انہوں نے جیل میں اسیران کو 14 اگست کی مبارکباد دی اور مٹھائی تقسیم کی۔
ڈپٹی کمشنر جہلم نے اسیران کو 14 اگست کے دن کی اہمیت سے آگاہ کیا اور ملک پاکستان کے لئے ہمارے آباؤ اجداد کی طرف سے دی جانے والی قربانیوں کو خراج تحسین پیش کیا۔
اس موقع پر اسیران میں والی بال، بیڈ منٹن اور نو عمر اسیران میں کیرم بورڈ کے مقابلوں میں بہترین کارکردگی دکھانے والے اسیران کھلاڑیوں میں ڈپٹی کمشنر سیدہ رملہ علی نے انعامات بھی تقسیم کئے۔
علاوہ ازیں مخیر حضرات کے تعاون سے خواتین، نوعمر اور نادار اسیران میں تحائف اور مٹھائی تقسیم کی گئی۔ دوران تقریب سکیورٹی کے سخت انتظامات کئے گئے تھے۔
