جہلم شہر کی معروف سماجی و مذہبی شخصیت سید خلیل حسین کاظمی نے کہا ہے کہ ویلنٹائن ڈے منانا حیا کے سراسر منافی ہے، حکومت ویلنٹائن ڈے منانے پر مستقل بنیادوں پر پابندی عائد کرے تاکہ غیر شرعی غیر اخلاقی سرگرمیوں کو روکا جاسکے۔
ان خیالات کا اظہار انہوں نے الیکٹرانک میڈیا جہلم پریس کلب کے صدر چوہدری عابد محمود سے خصوصی گفتگو کرتے ہوئے کیا۔ انہوں نے کہا کہ اس دن عزت و شرافت کے جنازے نکلتے ہیں ویلنٹائن ڈے غیر شرعی اور غیر اخلاقی دن ہے اس دن کو منانا حرام ہے اور یہ سراسر غیر اسلامی فعل ہے۔
انہوں نے کہا کہ ویلنٹائن ڈے منانا ہماری تباہی بربادی کے ساتھ ساتھ بے حیائی کو فروغ دے کر اللہ اور اس کے رسولﷺ کو ناراض کرنے کے مترادف ہے ۔ اس دن یوم محبت کے دلکش اور دلیر بدعنوان سے شیطانی عمل کو فروغ دیا جاتا ہے غیر مسلم اقوام کے مخصوص و متعین تہوار کو منا کر ان سے مشابہت کا وبال نوجوان نسل اپنے سر پر نہ لے رسول اللہﷺکا فرمان ہے کہ جو شخص کسی قوم کی مشابہت اختیار کرے گا قیامت کے دن اس کا حشر اسی قوم کے ساتھ ہوگا۔
سید خلیل حسین کاظمی نے کہا کہ امت مسلمہ ایسے دن منانے سے اجتناب کریں ، غیروں کے دنوں کو منا کر اپنی دنیا و آخرت برباد مت کریں مہذب معاشروں کا وجود شرم و حیا سے قائم ہے۔
