لندن: ماہ محرم الحرام اور شہادت حضرت امام حسین ودیگر شہدائے کربلاؓ کی عظیم قربانیاں ایثار کا درس دیتی ہیں، تمام مسالک کے علماءاتحاد و اتفاق کی مثال قائم کریں۔شہدائے کربلا ؓکی قربانیوں کو سامنے رکھتے ہوئے لوگوں کو دین کی طرف راغب کرنا ہو گا۔
ان خیالات کا اظہار سجادہ نشین امیر ملت مہرالملت پیر سید منور حسین شاہ جماعتی نے مشرقی لندن لوٹن کی جامع مسجد میں عظیم الشان محفل شہادت سیدنا حضرت امام حسینؓ کی صدارت کرتے ہوئے کیا۔ محفل کا آغاز سید رشید حسین شاہ جماعتی اور سید نعمان حسین شاہ جماعتی نے نعت رسول مقبول ﷺاور منقبت سے کیا۔
اس موقع پر چوہدری محمدشاہد جماعتی کی کتاب ’’الصلوٰۃ علی النبی وآلہ‘‘ کی رونمائی بھی کی گئی۔ پیر منور جماعتی نے کہا کہ ماہ محرم الحرام ہمیں رواداری، اخوت اور بھائی چارے کا درس دیتا ہے لہٰذا اس مقدس مہینے میں علماءکرام کی بنیادی ذمہ داری ہے کہ وہ اتحاد و اتفاق کی مثال قائم کریں۔ محرم الحرام مقدس مہینہ ہے، دین اسلام کی خاطر جانوں کا نذرانہ پیش کرنے والے شہدائے کربلاؓ کی قربانیاں ہمارے لئے باعث تقلید ہیں۔
انہوں نے کہا کہ ہم سب کو مل کر شہدائے کربلاؓ کی دین کیلئے دی جانے والی قربانیوں کو سامنے رکھتے ہوئے خود کو اور اپنے ارد گرد کے لوگوں کو دین کی طرف راغب کرنا ہو گا۔ محرم الحرام میں سوشل میڈیا پر انتشار پھیلانے والوں کے ساتھ آہنی ہاتھوں سے نمٹنے کی ضرورت ہے۔ علمائے کرام اجتماعات میں نوجوانوں کو نفرت پھیلانے سے روکیں اور انہیں رواداری کا درس دیں۔
انہوں نے کہا کہ حق کی ہمیشہ باطل پر فتح ہوئی ہے۔ حضرت امام حسینؓ نے کبھی جبر، طاقت یا دنیاوی جاہ وجلال کے سامنے سرنڈر نہیں کیابلکہ وہ ہمیشہ صداقت اوردیانت کے اصولوں پر ثابت قدم رہے۔ انہوں نے کہا کہ محرم ماتم کا مہینہ نہیں بلکہ ان اصولوں پر قائم رہنے کا اعادہ کرنے کا موقع ہے جن کیلئے امام حسینؓ کھڑے رہے۔
محفل کے اختتام پر پیر سید منور حسین شاہ جماعتی نے کشمیر، فلسطین سمیت پوری دنیا میں بسنے والے مسلمانوں باالخصوص اہلیانِ پاکستان کیلئے دعائے خیر کی۔ محفل کے منتظمین میں صوفی منظور احمدجماعتی، چیئرمین محمدشبیر جماعتی، سید حسین شاہ جماعتی و دیگر شامل تھے۔ اس موقع پر کثیر تعداد میں لوٹن و گردونواح سے یاران طریقت نے شرکت کی۔
