جہلم: محکمہ سوشل ویلفیئر جہلم کی شاندار کارکردگی پر ڈویژنل ڈائریکٹر سوشل ویلفیئر و بیت المال راولپنڈی محمد شاہد رانا نے ایک پروقار تقریب کے دوران محکمہ کے افسران اور عملے کو تعریفی اسناد سے نوازا۔
یہ اسناد وزیراعلیٰ پنجاب مریم نواز شریف کے فلاحی منصوبوں "دھی رانی”, "اسیسٹیو ڈیوائسز” اور "ہمت کارڈ پروگرام” میں شاندار کارکردگی اور بھرپور محنت کے اعتراف کے طور پر دی گئیں۔
ڈویژنل ڈائریکٹر محمد شاہد رانا نے اپنے خطاب میں کہا کہ محکمہ سوشل ویلفیئر کے افسران اور عملہ سماجی خدمت کے جذبے سے سرشار ہو کر عوام کی فلاح و بہبود کے لیے قابلِ تحسین خدمات انجام دے رہے ہیں۔ انہوں نے اطمینان کا اظہار کیا کہ جہلم ٹیم نے نہ صرف اپنے اہداف کامیابی سے حاصل کیے بلکہ مستحق اور خصوصی افراد تک سہولیات کی بروقت فراہمی بھی یقینی بنائی۔
اختتام پر ڈپٹی ڈائریکٹر سوشل ویلفیئر جہلم خضر حیات خان نے تمام اسٹاف کی جانب سے ڈویژنل ڈائریکٹر کا شکریہ ادا کرتے ہوئے کہا کہ ان کی حوصلہ افزائی سے ٹیم کا مورال بلند ہوا ہے۔ انہوں نے اس عزم کا اظہار کیا کہ سوشل ویلفیئر جہلم کی ٹیم وزیراعلیٰ پنجاب کے فلاحی وژن کے مطابق عوامی خدمت کے مشن کو مزید مؤثر انداز میں آگے بڑھاتی رہے گی۔
