دبئی: سابقہ حکومتوں کی طرف سے مسلم لیگ (ن) کے قائد محمد نواز شریف کے خلاف قائم کئے گئے نام نہاد اور جھوٹے مقدمات آخر کار ختم ہو گئے اور سپریم کورٹ نے انہیں با عزت بری کر دیا، جب نواز شریف کے خلاف مقدمات قائم کئے گئے تو نواز شریف نے کہا تھا کہ میں سا رے معاملات اللہ پر چھوڑتا ہوں وہی انصاف کرے گا، چند ہی سال کے اندر اللہ تعا لیٰ نے انصاف کیا اور انہیں تمام الزامات اور مقدمات سے بری کر دیا۔
ان خیالات کا اظہار پاکستان مسلم لیگ (ن) وومن ونگ متحدہ عرب امارات کی صدر اور سوشل میڈیا ٹیم کی ہیڈ فرزانہ کوثر، پاکستان مسلم لیگ (ن) دبئی کے صدر عامر سہیل گھمن اور پاکستان مسلم لیگ (ن) دبئی کے سینئر نائب صدرمیاں غلام محی الدین نے دبئی کے ایک ریسٹورنٹ میں منعقدہ پی ایم ایل این کی کارنر میٹنگ میں کیا۔
متذکرہ سیاسی رہنماؤں نے کہا کہ سپریم کورٹ کے فیصلے نے ثابت کر دیا کہ نواز شریف کے خلاف کیسز جھوٹے تھے- اللہ تعا لیٰ نے ہمارے قائد کو تمام مقدمات سے با عزت سرخرو کر دیا، اب نواز شریف کو الیکشن میں حصہ لینے اور جیتنے سے کوئی نہیں روک سکتا، آئندہ وزیراعظم وہی ہوں گے۔
فرزانہ کوثر،عامر سہیل گھمن اورغلام محی الدین نے کہا کہ اس وقت نواز شریف پاکستان کے عوام کے محبوب لیڈر ہیں اور مسلم لیگ (ن) پاکستان کی سب سے بڑی سیاسی جماعت ہے، پاکستان کے لوگ مسلم لیگ (ن) کے قائد نواز شریف کو اپنے مسائل کا نجات دہندہ سمجھتے ہیں۔
انہوں نے کہا کہ مسلم لیگ (ن) کے سابقہ ادوار حکومت میں پاکستان نے جس قدر ترقی کی وہ مثالی ہے، اب پھر مسلم لیگ (ن) کا وقت آ رہا ہے، ملک میں (ن) لیگ کی حکومت ہو گی اور پاکستان نواز شریف کی قیادت ایک بار پھر ترقی کی منازل طے کرے گا۔
