جہلم: مرکزی علماء کونسل جہلم کے قائدین نے مریدکے موٹروے انٹرچینج کے قریب ٹریفک حادثے میں ایلیٹ فورس جہلم کے دو جوانوں کی شہادت پر گہرے دکھ اور افسوس کا اظہار کیا ہے اور شہدا کے اہلِ خانہ سے دلی تعزیت کی ہے۔
مرکزی علماء کونسل جہلم کی جانب سے جاری مشترکہ تعزیتی بیان میں رہنماؤں نے شہید پولیس اہلکاروں کو خراجِ عقیدت پیش کرتے ہوئے کہا کہ پولیس فورس کے یہ بہادر جوان قوم کا سرمایہ ہیں، جو عوام کے تحفظ اور اپنے فرائض کی ادائیگی کے لیے خدمات انجام دیتے ہیں۔
رہنماؤں نے کہا کہ مرکزی علماء کونسل جہلم اس دکھ کی گھڑی میں شہید جوانوں کے لواحقین اور پنجاب پولیس کے غم میں برابر کی شریک ہے۔ انہوں نے دعا کی کہ اللہ تعالیٰ شہدا کے درجات بلند فرمائے، انہیں جوارِ رحمت میں اعلیٰ مقام عطا کرے اور سوگوار خاندانوں کو یہ عظیم صدمہ برداشت کرنے کے لیے صبرِ جمیل عطا فرمائے۔
مرکزی علماء کونسل کے قائدین نے حادثے میں زخمی ہونے والے پولیس اہلکاروں کی جلد اور مکمل صحت یابی کے لیے بھی دعا کی اور شہدا کے اہلِ خانہ سے دلی ہمدردی کا اظہار کیا۔
