جہلم شہر کی سبزی و فروٹ منڈیاں شہریوں کے لئے عذاب بن گئی۔
عورتوں، بچوں، بوڑھوں، عام شہریوں اور خریداروں کا گزرنا انتہائی مشکل ہوگیا جبکہ مارکیٹ کمیٹی کی طرف سے آڑھتیوں، بیوپاریوں، گاہکوں اور زمینداروں کیلئے شدید سردی کے موسم میں بیٹھنے اور پینے کا صاف پانی کا کوئی بندوبست نہیں اور نہ ہی سیکورٹی کا کوئی معقول انتظام یاسہولت موجود ہے۔
جہلم کی سبزی و فروٹ منڈی اس وقت سکیورٹی رسک بن چکی ہے۔ اسی طرح مارکیٹ کمیٹی کے متعلقہ ذمہ داران کی عدم دلچسپی کے باعث سبزیوں و پھلوں کی روزانہ کی بنیاد پر نرخ ناموں کے مطابق گاہکوں سے وصولی نہیں کی جاتی اور نرخ نامے بھی بروقت آویزاں نہیں کئے جاتے اور نہ ہی کہیں کوئی عملداری نظر آتی ہے۔
دکاندار اپنی من مرضی کے نرخ وصول کرتے دکھائی دیتے ہیں، مارکیٹ کمیٹی کا عملہ حصہ بقدرجثہ وصول کرکے شہریوں کا تماشا دیکھتا رہتاہے۔ شہریوں نے سبزی منڈی میں سہولتوں کے فقدان، گاڑیوں، چنگ چی رکشوں، لوڈررکشوں کی وجہ سے منڈی کے راستے کو بند کرکے خریداروں کی آمدورفت میں رکاوٹیں کھڑی کر رکھی ہیں۔
شہریوں نے سبزی و فروٹ منڈی میں قائم ہونے والی غیر قانونی تجاوزات بارے شدید الفاظ میں احتجاج کرتے ہوئے وزیراعلیٰ پنجاب، چیف سیکرٹری پنجاب، کمشنر راولپنڈی اور ڈپٹی کمشنر سے مطالبہ کیاہے کہ وہ منڈی کی موجودہ صورتحال و مسائل کاجائزہ لیتے ہوئے منڈی میں قائم تجاوزا ت اور مصنوعی مہنگائی کے خاتمے کے لئے روزانہ کی بنیاد پر منڈی کا خود دورہ کریں تاکہ گراں فروشی کا خاتمہ ممکن ہو سکے۔
