جہلم: ڈپٹی کمشنر جہلم میثم عباس نے سردیوں کی تعطیلات کے دوران گورنمنٹ الطاف حسین سکول اور تبلیغ السلام ہائی سکول کا دورہ کیا۔ انہوں نے دونوں سکولوں میں دستیاب سہولیات کا بغور جائزہ لیا اور سکول انتظامیہ کو طلبا کے لیے محفوظ اور تعلیمی لحاظ سے سازگار ماحول فراہم کرنے کی ہدایت کی۔
ڈپٹی کمشنر نے اپنے دورے کے دوران اس بات پر زور دیا کہ سکولوں میں پینے کے صاف پانی کی فراہمی، ہوا دار کلاس رومز اور مناسب بیٹھنے کی جگہ کو یقینی بنایا جائے۔ انہوں نے کہا کہ ہر سکول کو طلبا و طالبات کے لیے ایسا ماحول فراہم کرنا چاہیے جہاں وہ سکون سے تعلیم حاصل کر سکیں اور کسی قسم کی پریشانی یا تکلیف کا سامنا نہ ہو۔
ڈپٹی کمشنر میثم عباس نے سکول انتظامیہ کو تمام سہولیات کو فوری طور پر بہتر بنانے کی ہدایت دی تاکہ تعلیمی معیار میں بہتری لائی جا سکے۔ انہوں نے کہا کہ ایک صحت مند اور تعلیمی لحاظ سے موزوں ماحول فراہم کرنا نہ صرف طلبا کی تعلیمی کارکردگی کے لیے ضروری ہے بلکہ یہ ان کی مجموعی نشوونما میں بھی معاون ثابت ہوتا ہے۔
