جہلم: حاجی زاہد حسین بٹ نے کہا کہ آپریشن "بنیان مرصوص” نے بھارت کے غرور کو مٹی میں ملا دیا ہے اور پاکستانی شاہینوں کو اعلیٰ عسکری صلاحیتوں کے ساتھ ایمان کی طاقت حاصل ہے۔ انہوں نے کہا کہ بھارتی غرور اب چیخوں اور آہوں میں تبدیل ہو چکا ہے۔
افواج پاکستان کے حق میں نکالی گئی ریلی سے خطاب کرتے ہوئے جہلم چیمبر آف کامرس کے صدر حاجی زاہد حسین بٹ نے کہا کہ پاکستانی قوم افواج پاکستان کے ساتھ شانہ بشانہ کھڑی ہے اور اس نے کفر کے ایوانوں میں زلزلہ طاری کر دیا ہے۔ انہوں نے کہا کہ ثالثی کی پیشکش کرنے والے ممالک کو بھارت کی جارحیت کے جواب میں ابھی کچھ وقت تک انتظار کرنا چاہیے تھا۔
انہوں نے مزید کہا کہ اگرچہ بھارت نے گھٹنے ٹیک دیے ہیں، لیکن اس کو ابھی مزید سبق سکھانے کی ضرورت ہے۔ اللہ تعالیٰ کے فضل و کرم سے وہ وقت قریب آ چکا ہے جب سرینگر کے لال چوک اور دہلی کے لال قلعے پر سبز سفید پاکستانی پرچم لہرائیں گے۔
حاجی زاہد حسین بٹ نے اس بات پر زور دیا کہ پاکستان اور بھارت کی جنگ صرف دو ملکوں کی جنگ نہیں، بلکہ دو نظریوں کی جنگ ہے۔ انہوں نے کہا کہ بھارت اپنی آبادی کے لحاظ سے بڑا ملک سہی، مگر اس کی ایک بڑی تعداد بھی اسی کلمے پر ایمان لاتی ہے جس کی بنیاد پر پاکستان معرض وجود میں آیا۔ وہ نظریہ پاکستان کی فولادی قوت کے مقابلے میں مودی کے پاس کوئی نظریاتی طاقت نہیں رکھتے۔
