جہلم: مرغی کے گوشت کی قیمتوں میں اضافے کا رحجان جاری، فی کلو گوشت 597 روپے تک پہنچ گیا۔
تفصیلات کے مطابق جہلم میں مرغی کے گوشت کی قیمتوں میں مسلسل اضافہ دیکھنے کو مل رہا ہے، جس کے باعث شہریوں کی پریشانی میں اضافہ ہو گیا ہے۔
چند ہفتے قبل برائلر گوشت کی قیمت 340 روپے فی کلو تھی، تاہم گزشتہ ماہ اچانک اس میں 300 روپے تک کا اضافہ ہو کر یہ 600 روپے فی کلو تک پہنچ چکا ہے۔ اس وقت مرغی کا گوشت 597 روپے فی کلو کے حساب سے فروخت کیا جا رہا ہے۔
شہریوں کا کہنا ہے کہ شادیوں اور دیگر تقریبات کے سیزن کے آغاز کے ساتھ ہی پولٹری فارمز مالکان نے زندہ برائلر کی قیمتوں میں اضافہ کر کے لوٹ مار کا سلسلہ شروع کر دیا ہے۔ پولٹری فارم مالکان جو شادیوں کے سیزن کے پیش نظر پیداوار میں اضافہ کرتے ہیں نے اس موقع کا فائدہ اٹھاتے ہوئے گوشت کی قیمتوں میں بے تحاشا اضافہ کر دیا ہے۔
شہریوں نے ڈپٹی کمشنر جہلم سے مطالبہ کیا ہے کہ برائلر گوشت کی قیمتوں کو کنٹرول کرنے کے لیے فوری اقدامات کیے جائیں تاکہ عوام کو ریلیف مل سکے اور ان پر مزید بوجھ نہ پڑے۔
