جہلم پولیس نے ماہ فروری کے دوران جرائم کے خاتمے اور شہریوں کے جان و مال کے تحفظ کے لیے مؤثر کارروائیاں کرتے ہوئے نمایاں کامیابیاں حاصل کیں۔ 11 گینگ کو گرفتار کر کے 54لاکھ77ہزارروپے مال مسروقہ برآمد کر لیا گیا۔
تفصیلات کے مطابق ڈسٹرکٹ پولیس آفیسر جہلم طارق عزیز سندھو کی قیادت میں ضلع بھر میں امن و امان برقرار رکھنے، اغواء، قتل، اندھے قتل، چوری، ڈکیتی، رابری اور دیگر سنگین نوعیت کے مقدمات کی تفتیش اور ملزمان کی گرفتاری کے لیے جہلم پولیس دن رات مصروف عمل رہی۔
گزشتہ ماہ کے دوران قتل کے چھ مقدمات درج کیے گئے، جن میں 11 ملزمان کو گرفتار کر لیا گیا۔ اسی طرح ریپ کے دو مقدمات درج ہوئے، جن میں ایک ملزم کو گرفتار کیا گیا جبکہ گینگ ریپ کے تین مقدمات میں ملوث چھ ملزمان کو بھی قانون کی گرفت میں لے لیا گیا۔ بچوں کے ساتھ زیادتی کے پانچ مقدمات درج کیے گئے، جن میں پانچ ملزمان کو گرفتار کر لیا گیا۔
فروری کے دوران جہلم پولیس نے 105 مجرمان اشتہاریوں کو گرفتار کیا، جن میں کیٹیگری "اے” کے 19 اور کیٹیگری "بی” کے 59 اشتہاری مجرم شامل تھے جبکہ 27 عدالتی مفروران کو بھی حراست میں لے لیا گیا۔ جرائم برخلاف پراپرٹی کے تحت 11 گینگز کو ٹریس کر کے 30 ملزمان کو گرفتار کیا گیا، جن سے مجموعی طور پر 54 لاکھ 77 ہزار روپے کا مسروقہ مال، 10 موٹر سائیکل، ایک پستول اور ایمونیشن برآمد کیا گیا۔
جہلم پولیس نے منشیات کے خلاف مؤثر کریک ڈاؤن کیا اور 33 مقدمات درج کر کے 34 ملزمان کو گرفتار کیا۔ ان کے قبضے سے 26 کلو 350 گرام چرس، 3 کلو 542 گرام ہیروئن، 6 کلو 633 گرام آئس اور 300 بوتلیں شراب برآمد کی گئیں۔ غیر قانونی اسلحہ رکھنے والوں کے خلاف بھی کارروائی کرتے ہوئے 40 مقدمات درج کیے گئے اور 41 ملزمان کو گرفتار کیا گیا، جن کے قبضے سے 52 پستول، 6 کلاشنکوف، 4 گنز/رائفل اور 501 گولیاں برآمد ہوئیں۔
پتنگ بازی کے خلاف بھی کارروائیاں جاری رہیں اور 7 مقدمات درج کیے گئے، جن میں 7 ملزمان کو گرفتار کر کے 202 پتنگیں اور 4 ڈوریں برآمد کی گئیں۔ جہلم پولیس خدمت مراکز کے ذریعے ماہ فروری میں 9815 شہریوں کو مختلف سہولیات فراہم کی گئیں۔
ٹریفک قوانین کی خلاف ورزی پر سختی سے عمل درآمد کرتے ہوئے 5059 چالان کیے گئے اور مجموعی طور پر 54 لاکھ 95 ہزار 700 روپے کا جرمانہ عائد کیا گیا۔ اس کے علاوہ ڈسٹرکٹ پولیس آفیسر جہلم نے ضلع بھر کے مختلف تھانوں اور دفاتر میں 23 کھلی کچہریوں کا انعقاد کیا، جہاں شہریوں کی شکایات کو سنا گیا اور ان کے فوری حل کے لیے احکامات جاری کیے گئے۔
جہلم پولیس کی ان کامیاب کارروائیوں سے ضلع بھر میں امن و امان کی صورتحال بہتر ہوئی ہے اور عوام میں تحفظ کا احساس بڑھا ہے۔ ڈسٹرکٹ پولیس آفیسر جہلم نے اس عزم کا اظہار کیا ہے کہ شہریوں کی جان و مال کی حفاظت کے لیے پولیس مستقبل میں بھی اسی جوش و جذبے کے ساتھ اپنے فرائض سرانجام دیتی رہے گی۔
انہوں نے کہا کہ پولیس نے منشیات کے مکمل خاتمے اور جرائم پیشہ عناصر کے خلاف گھیرا تنگ کرنے کے لیے بھی بھرپور اقدامات کیے۔ کمیونٹی پولیسنگ، عوام کو بروقت انصاف کی فراہمی، شہریوں کے جان و مال کی حفاظت اور سیکیورٹی فراہم کرنے کے لیے جہلم پولیس ہر وقت تیار ہے۔
