جہلم شہر اور گردونواح میں سڑکوں، گلی محلوں اور شاہراہوں کے اطراف قائم غیر قانونی اور خودساختہ مویشی منڈیوں نے شہریوں کی مشکلات میں اضافہ کر دیا ہے۔
جگہ جگہ مویشیوں کی خرید و فروخت کے باعث ٹریفک کی روانی بری طرح متاثر ہو رہی ہے جبکہ شہریوں کو آمدورفت میں شدید دشواری کا سامنا کرنا پڑ رہا ہے۔
ضلعی انتظامیہ کی جانب سے فوجی مل گراؤنڈ میں باقاعدہ سرکاری مویشی منڈی قائم کی گئی ہے، تاہم متعدد مقامی بیوپاری سرکاری منڈی میں منتقل ہونے کے بجائے شہر کے مختلف علاقوں میں غیر قانونی مویشی منڈیاں قائم کیے ہوئے ہیں۔
شہریوں کا کہنا ہے کہ سڑکوں کے کنارے جانور باندھنے اور خرید و فروخت کے باعث نہ صرف ٹریفک جام معمول بن چکا ہے بلکہ پیدل چلنے والوں اور دکانداروں کو بھی شدید مشکلات کا سامنا کرنا پڑ رہا ہے۔
عوامی حلقوں نے مطالبہ کیا ہے کہ شہر بھر میں قائم غیر قانونی مویشی منڈیوں کے خلاف مؤثر کارروائی عمل میں لائی جائے اور تمام بیوپاریوں کو فوجی مل گراؤنڈ منتقل کیا جائے تاکہ ٹریفک کی روانی بحال ہو اور شہریوں کو درپیش مسائل میں کمی لائی جا سکے۔
شہری حلقوں نے صورتحال پر تشویش کا اظہار کرتے ہوئے ڈپٹی کمشنر جہلم سے فوری نوٹس لینے کا مطالبہ کیا ہے۔
