جہلم/پنڈدادنخان: ضلع جہلم میں زلزلے کے شدید جھٹکے، پنڈدادنخان کے علاقے جلالپور شریف میں مکانات گرنے اور لینڈ سلائیڈنگ سے 12 سالہ لڑکا جاں بحق اور، بچی اور خواتین سمیت 11 افراد زخمی ہو گئے۔
تفصیلات کے مطابق ضلع جہلم میں زلزلے کے شدید جھٹکے محسوس کیے گئے، جس کے باعث خوف و ہراس پھیل گیا جبکہ پنڈدادنخان کے علاقے جلالپور شریف میں لینڈ سلائیڈنگ اور مکانات گرنے کے افسوسناک واقعات میں 12 سالہ لڑکا جاں بحق اور بچی و خواتین سمیت 11 افراد زخمی ہو گئے۔
ڈی ایس پی پنڈدادنخان میاں عبدالجبار کے مطابق زلزلے کے نتیجے میں ایک 12 سالہ لڑکا جاں بحق ہوا جبکہ 11 افراد زخمی ہیں، جن میں سے تین زخمیوں کی حالت تشویشناک ہونے پر انہیں منڈی بہاؤالدین ہسپتال ریفر کر دیا گیا ہے۔
ریسکیو 1122 کے مطابق جلالپور شریف میں زلزلے کے باعث ایک مکان کی چھت گر گئی، جس کے نتیجے میں 12 سالہ عمر ولد میر سلطان ملبے تلے دب کر جاں بحق ہو گیا۔
حادثے میں ایک بچی اور تین خواتین سمیت متعدد افراد زخمی ہوئے، جنہیں فوری طور پر رورل ہیلتھ سینٹر (RHC) جلالپور شریف منتقل کیا گیا جبکہ بعض زخمیوں کو مزید علاج کیلئے ڈی ایچ کیو ہسپتال جہلم اور منڈی بہاؤالدین منتقل کیا جا رہا ہے۔
ڈی ایس پی میاں عبدالجبار کے مطابق اب تک 8 زخمیوں کو آر ایچ سی جلالپور شریف منتقل کیا جا چکا ہے جبکہ مزید تفصیلات اکٹھی کی جا رہی ہیں۔
ریسکیو ذرائع کے مطابق زلزلے کے باعث جلالپور شریف اور گردونواح میں متعدد مکانات اور دکانوں کو نقصان پہنچا جبکہ کئی عمارتوں کے منہدم ہونے کی اطلاعات بھی موصول ہوئی ہیں۔ زلزلے سے تھانہ جلالپور شریف کی عمارت کو بھی نقصان پہنچنے کی اطلاعات ہیں۔
اطلاع ملتے ہی ریسکیو 1122 کی ٹیمیں، ضلعی انتظامیہ اور مقامی اہلکار موقع پر پہنچ گئے اور امدادی کارروائیاں شروع کر دیں۔ مختلف علاقوں میں سرچ اینڈ ریسکیو آپریشن جاری ہے جبکہ متاثرہ مکانات کا جائزہ بھی لیا جا رہا ہے۔
زلزلہ پیما مرکز کے مطابق زلزلے کی شدت 4 اعشاریہ 8 ریکارڈ کی گئی جبکہ اس کی گہرائی 12 کلومیٹر تھی، زلزلے کا مرکز ساؤتھ ویسٹ جہلم 58 کلومیٹر تھا۔ شدید جھٹکوں کے باعث شہری خوفزدہ ہو کر کلمہ طیبہ کا ورد کرتے ہوئے گھروں سے باہر نکل آئے۔
ضلعی انتظامیہ نے شہریوں سے احتیاطی تدابیر اختیار کرنے اور غیر محفوظ عمارتوں سے دور رہنے کی اپیل کی ہے جبکہ متاثرہ علاقوں میں امدادی سرگرمیاں جاری ہیں۔
