مقبوضہ کشمیر میں 76 سال سے جاری بھارتی ظلم و بربریت کے خلاف جہلم میں بھرپور انداز میں یوم سیاہ منایا گیا۔
جہلم میں 27 اکتوبر یوم سیاہ کے موقع پر ضلعی انتظامیہ کے زیر اہتمام احتجاجی ریلی نکالی گئی، ریلی کی قیادت ڈپٹی کمشنر جہلم کیپٹن (ر) سمیع اللہ فاروق اور ڈی پی او جہلم ناصر محمود باجوہ نے کی۔
ریلی میں اے ڈی سی آر، اے سی جہلم سمیت تمام سرکاری ملازمین، سکول اور کالج کے طلبہ نے شرکت کی۔ پولیس سمیت سرکاری،غیر سرکاری اداروں،وکلاء سول سوسائٹی، شہریوں، مذہبی نمائندوں، صحافیوں اور تاجروں نے سڑکوں پر نکل کر کالے جھنڈے،کالی پٹیاں باندھ کربھارت مخالف شدید نعرے بازی اور احتجاجی مظاہر ہ کیا۔
ریلی کے شرکاء نے عالمی برداری سے مطالبہ کیا کہ وہ کشمیریوں کے ساتھ بھارتی ظلم وستم کو بند کرانے میں اپنا کردار ادا کرے، آئے روز کرفیو لگایا جاتا ہے اس کو ختم کیا جائے اور مظلوم کشمیریوں کو آزادی دی جائے۔
ریلی سے خطاب کرتے ہوئے مقررین نے کہا کہ مقبوضہ کشمیر کے اندر غیر ریاستی لوگوں کو پذیرائی دی جا رہی ہے جس کی شدید الفاظ میں مذمت کرتے ہیں ، 1947 سے لیکر آ ج تک لاتعداد کشمیریوں نے جانوں کا نذرانہ پیش کیا۔ 6 نومبر 1947 کا دن بھی ہمیں یاد ہے، اس واقعہ کو کبھی فراموش نہیں کیا جا سکتا۔
انہوں نے کہا کہ عالمی برادری 75 سالوں سے ہماری بات نہیں سن رہی، کشمیر صرف باتوں سے نہیں عملی کوشش سے آزاد ہو گا۔ 1947 سے لے کر آج تک مسلمانوں کے ساتھ ظلم ہوا، مسلمان آج بھی بھارت کے مظالم سے مر رہے ہیں، ظلم اور بربریت کو ختم کیا جائے، بھارت ظلم بند کرے،بھارتی تسلط کو مسترد کرتے ہیں۔
انہوں نے کہا کہ ہم پاکستان کی بہادر مسلح افواج کو سلام پیش کرتے ہیں ان کی جرات اور بہادری کو خراج تحسین پیش کرتے ہیں جو کنٹرول لائن پر پہاڑوں کی چوٹیوں پر دفاع وطن کے لیے قیمتی جانوں کے نذرانے پیش کر رہے ہیں اور آ ج کے دن سے یہ عزم اور ارادہ کرتے ہیں کہ کسی بھی قسم کی قربانی سے دریغ نہیں کریں گے۔
ریلی کے اختتام پر مقبوضہ جموں و کشمیر کے مظلوم کشمیریوں کے لیے خصوصی دعا کی گئی۔
