جہلم: مذہبی جماعت کے ممکنہ احتجاج اور مارچ کے پیش نظر جہلم میں سیکیورٹی انتظامات کو حتمی شکل دے دی گئی۔
ڈپٹی کمشنر جہلم میر رضا اوزگن اور ڈسٹرکٹ پولیس آفیسر جہلم طارق عزیز سندھو نے مشترکہ طور پر دریائے جہلم کے تینوں پلوں کا تفصیلی دورہ کیا اور حفاظتی اقدامات کا جائزہ لیا۔
دورے کے دوران اعلیٰ حکام نے پل کے دونوں اطراف اور اس کے داخلی و خارجی راستوں پر تعینات سیکیورٹی اہلکاروں سے ملاقات کی اور ان کی بریفنگ لی۔
ڈپٹی کمشنر میر رضا اوزگن نے اس موقع پر کہا کہ قانون کی حکمرانی ہر صورت یقینی بنائی جائے گی اور کسی بھی گروہ کو امن عامہ خراب کرنے کی اجازت نہیں دی جائے گی۔
ڈی پی او طارق عزیز سندھو نے سیکیورٹی فورسز کو سخت ہدایات جاری کرتے ہوئے کہا کہ پلوں پر ناکہ بندی مؤثر، منظم اور غیر متزلزل رکھی جائے، تمام اہلکار ہائی الرٹ رہیں، اور کسی بھی صورتحال میں فوری ردعمل کے لیے تیار رہیں۔
انہوں نے کہا کہ مذہبی جماعت کے مارچ کو پرامن طور پر روکنے اور شہریوں کے جان و مال کے تحفظ کے لیے تمام وسائل بروئے کار لائے جا رہے ہیں۔
ضلعی انتظامیہ نے شہریوں سے اپیل کی ہے کہ وہ پرامن رہیں اور قانون نافذ کرنے والے اداروں سے مکمل تعاون کریں تاکہ شہر کا امن برقرار رہے۔
