سوہاوہ کے علاقے بوکن میں بااثر افراد نے اپنی عدالت لگا کر نعت خوان کو تشدد کا نشانہ بنا ڈالا۔
تفصیلات کے مطابق جہلم کی تحصیل سوہاوہ کے تھانہ ڈومیلی کے علاقے بوکن میں دینہ کے رہائشی نعت خواں رمیض احمد کو مبینہ طور پر تشدد اور تذلیل کا نشانہ بنانے کا واقعہ سامنے آیا ہے، جہاں متعدد افراد نے قانون ہاتھ میں لیتے ہوئے اپنی عدالت لگا کر متاثرہ شخص کو تشدد کا نشانہ بنایا۔
جہلم اپڈیٹس کو موصول ہونے ویڈیو میں مبینہ طور پر متاثرہ شخص کو برہنہ کرکے اس کا منہ کالا کرنے اور تذلیل کرنے کے مناظر دکھائی دیتے ہیں۔ واقعے کی ویڈیو سامنے آنے کے بعد ڈی پی او جہلم شفیق احمد چوہدری نے معاملے کا نوٹس لیتے ہوئے پولیس کو کارروائی کی ہدایت کی۔
پولیس کے مطابق ویڈیو میں نظر آنے والے تین ملزمان کو گرفتار کر لیا گیا ہے۔ ابتدائی طور پر پولیس کا کہنا ہے کہ ملزمان نے ایک خاتون سے مبینہ تعلقات کے الزام میں نعت خواں کے خلاف انتہائی اقدام اٹھاتے ہوئے اسے تشدد اور تذلیل کا نشانہ بنایا۔
پولیس حکام کے مطابق واقعے کے مدعی کی درخواست موصول ہو چکی ہے اور اس کی روشنی میں جلد مقدمہ درج کرکے مزید قانونی کارروائی عمل میں لائی جائے گی۔
پولیس کا کہنا ہے کہ کسی بھی شخص کو قانون ہاتھ میں لینے اور کسی شہری کو تشدد یا تذلیل کا نشانہ بنانے کی اجازت نہیں دی جائے گی، جبکہ واقعے کی مزید تحقیقات جاری ہیں۔
