جہلم: ضلعی ہیڈ کوارٹر سمیت ضلع بھر میں گھومنے والے خونخوار ، آوارہ اور خارش زدہ کتوں نے شہریوں کا جینا دوبھر کر دیا۔
شہر کے چوک چوراہوں ، گلی محلوں اور پبلک مقامات پر خونخوار کتوں کے غول کے غول نظر آتے ہیں ، جس کی وجہ سے شہریوں کا گھروں سے نکلنا دوبھر ہو چکاہے ، بالخصوص طلباء و طالبات کو سکولز ، کالجز جانے اور نمازیوں کو مساجد میں جاتے وقت شدید دشواری کا سامنا کرنا پڑتا ہے۔
جہلم شہر کے مختلف علاقوں میں گھومنے والے آورہ کتے متعددی امراض پھیلانے کا باعث بن رہے ہیں میونسپل کمیٹی کی انتظامیہ اس صورتحال کا نوٹس لینے سے گریزاں ہے۔
اس حوالے سے شہری سماجی، رفاعی ، فلاحی اور مذہبی تنظیموں کے عمائدین کا کہنا ہے کہ گزشہ کئی ماہ سے شہر سمیت ضلع بھر میں ڈاگ کلنگ مہم نہیں چلائی گئی جس کے باعث آوارہ کتوں کی تعداد میں خوفناک حد تک اضافہ ہو چکا ہے ، آوارہ کتوں کو تلف کرنے کی ذمہ داری محکمہ صحت اورمیونسپل کمیٹی کے عملے پر عائد ہوتی ہے۔
شہریوں نے ڈپٹی کمشنر سے مطالبہ کیا ہے کہ متعلقہ اداروں کو ڈاگ کلنگ مہم چلانے کے احکامات جاری کئے جائیں تاکہ شہریوں میں پائے جانے والے خوف کا خاتمہ ممکن ہو سکے۔
