جہلم:ریسکیو 1122 جہلم نے جولائی 2025 کے دوران شاندار کارکردگی کا مظاہرہ کرتے ہوئے مجموعی طور پر 4517 افراد کو ریسکیو کیا، جن میں سے 1617 مریضوں کو ابتدائی طبی امداد کے بعد مختلف ہسپتالوں میں منتقل کیا گیا۔
یہ تفصیلات ڈسٹرکٹ ایمرجنسی آفیسر انجینئر سعید احمد کی صدارت میں منعقدہ ماہانہ کارکردگی جائزہ اجلاس میں پیش کی گئیں۔ ماہ جولائی میں ریسکیو 1122 ہیلپ لائن پر 12866 کالز موصول ہوئیں، جن میں سے 2746 ایمرجنسی نوعیت کی تھیں۔
ایمرجنسیز کی تفصیل کچھ یوں ہے:
- روڈ ٹریفک حادثات: 310
- میڈیکل ایمرجنسیز: 1886
- آگ لگنے کے واقعات: 13
- جرائم سے متعلقہ ایمرجنسیز: 32
- ڈوبنے کے واقعات: 07
- عمارت گرنے کے واقعات: 02
- متفرق ایمرجنسیز: 496
ان ایمرجنسیز کے دوران بدقسمتی سے 93 افراد جان کی بازی ہار گئے، جن میں زیادہ تر اموات میڈیکل ایمرجنسیز کے باعث ہوئیں۔
ریسکیو 1122 جہلم نے اپنی بہتر اور بروقت سروس کی روایت برقرار رکھتے ہوئے اوسط رسپانس ٹائم 8 اعشاریہ 6 منٹ ریکارڈ کیا جو کہ ادارے کی مستعدی اور عوامی خدمت کے جذبے کا مظہر ہے۔
اجلاس میں بتایا گیا کہ کمیونٹی سیفٹی پروگرام کے تحت مختلف اسکولز، کالجز اور اداروں میں فرسٹ ایڈ اور فائر سیفٹی کی تربیتی ورکشاپس کا انعقاد کیا گیا۔ اس کے علاوہ، یونین کونسل کی سطح پر کمیونٹی ایمرجنسی ریسپانس ٹیموں کی تشکیل کا عمل جاری ہے اور سکاؤٹس کو CADRE ٹریننگ بھی فراہم کی جا رہی ہے۔
علاوہ ازیں، پیشنٹ ٹرانسفر سروس کے ذریعے ضلع جہلم سے 75 مریضوں کو بہتر علاج کے لیے راولپنڈی، اسلام آباد اور سرگودھا کے ہسپتالوں میں منتقل کیا گیا۔
ڈسٹرکٹ ایمرجنسی آفیسر انجینئر سعید احمد نے تمام ریسکیو اہلکاروں کو سراہتے ہوئے عوام سے اپیل کی کہ وہ ایمرجنسی کی صورت میں 1122 پر فوری رابطہ کریں اور افواہوں یا غیرضروری کالز سے گریز کریں تاکہ بروقت مدد یقینی بنائی جا سکے۔
