جہلم سمیت ملک بھر میں تمام بجلی کی تقسیم کار کمپنیوں (ڈسکوز) کے بل اب پاکستان پوسٹ کے ذریعے تقسیم کیے جائیں گے۔
انتہائی باوثوق ذرائع کے مطابق حکومت نے بلوں کی بروقت ترسیل، شفافیت اور اخراجات میں کمی کے لیے یہ بڑا اصلاحاتی اقدام اٹھایا ہے۔
ابتدائی طور پر اس نظام کا آغاز آزمائشی بنیادوں پر کیا جا رہا ہے، جہاں ہر ڈسکوز کے ایک سب ڈویژن میں پاکستان پوسٹ کا عملہ بجلی کے بل تقسیم کرے گا۔ پائلٹ پراجیکٹ کی کامیابی کی صورت میں اس نظام کو مرحلہ وار پورے ملک میں نافذ کیا جائے گا۔
حکام کا کہنا ہے کہ آئندہ چھ ماہ کے اندر پورے ملک میں بجلی کے بلوں کی مکمل تقسیم کا نظام پاکستان پوسٹ کے حوالے کر دیا جائے گا۔ ذرائع کے مطابق آخری مرحلے میں بجلی کے بلوں کی چھپائی کی ذمہ داری بھی پاکستان پوسٹ انجام دے گی۔
اس سلسلے میں تمام ریجنل پوسٹ ماسٹر جنرلز کو ہدایات جاری کر دی گئی ہیں تاکہ پاکستان پوسٹ کا عملہ پیشگی تیاری مکمل کر سکے۔ ذرائع کا مزید کہنا ہے کہ کراچی میں کے الیکٹرک کے ساتھ بھی اس حوالے سے بات چیت جاری ہے تاکہ وہاں کے صارفین کو بھی اسی نظام کے تحت سہولت میسر آ سکے۔
یہ نیا اقدام بلوں کی بروقت ترسیل، شفاف نظام اور لاگت میں کمی کے لیے حکومت کی اہم اصلاحاتی پالیسی کا حصہ قرار دیا جا رہا ہے۔
