پنڈدادنخان شہر میں نکاسی آب کے راستے بند ہونے کے باعث محلہ نئی آبادی سے ملحقہ حولات والا قبرستان بارشی پانی کے تالاب میں تبدیل ہو گیا، جس سے متعدد قبروں کو نقصان پہنچنے اور قبرستان کے تقدس کو متاثر ہونے پر شہریوں میں شدید تشویش پائی جا رہی ہے۔
مقامی شہریوں کے مطابق شہر میں نکاسی آب کے قدرتی راستوں پر مبینہ تجاوزات اور متعلقہ اداروں کی عدم توجہی کے باعث بارشی پانی قبرستان میں جمع ہوگیا۔ کئی قبریں پانی سے متاثر ہوکر بیٹھ گئی ہیں جبکہ بعض قبروں کے نشانات بھی مٹ گئے ہیں۔
قبرستان میں کھڑے پانی کے باعث تعفن پھیلنے سے اپنے پیاروں کی قبروں پر فاتحہ خوانی کے لیے آنے والے شہریوں کو بھی شدید مشکلات کا سامنا ہے۔ لواحقین کا کہنا ہے کہ ہر جمعرات اور جمعہ وہ اپنے پیاروں کی آخری آرام گاہوں پر حاضری دیتے ہیں، تاہم موجودہ صورتحال نے انہیں شدید ذہنی اذیت میں مبتلا کر دیا ہے۔
شہریوں کا کہنا ہے کہ نکاسی آب کے راستوں پر تجاوزات اور انتظامیہ کی مبینہ عدم توجہی اب صرف شہری مسائل تک محدود نہیں رہی بلکہ قبرستانوں کے تقدس کے لیے بھی سنگین خطرہ بن چکی ہے۔
اہل علاقہ نے اعلیٰ حکام سے مطالبہ کیا ہے کہ قبرستان سے فوری طور پر بارشی پانی نکالا جائے، بند نالوں اور نکاسی آب کے راستے بحال کیے جائیں اور تجاوزات کے خلاف بلاامتیاز کارروائی عمل میں لائی جائے تاکہ آئندہ بارشوں کے دوران قبروں اور شہری آبادی کو مزید نقصان سے محفوظ رکھا جا سکے۔
