جہلم: دینہ میں سی سی ڈی سے مبینہ مقابلہ، سنگین جرائم میں ملوث اشتہاری مجرم ہلاک

دینہ/ جہلم: دینہ میں سی سی ڈی اور خطرناک اشتہاریوں کے درمیان مبینہ مقابلے میں خطرناک اشتہاری ملزم مارا گیا۔

تفصیلات کے مطابق جہلم کی تحصیل دینہ کے علاقے تین پورہ کے قریب کاؤنٹر کرائم ڈپارٹمنٹ اور خطرناک اشتہاری ملزمان کے درمیان مبینہ پولیس مقابلہ ہوا، جس کے نتیجے میں سنگین جرائم میں ملوث مرکزی ملزم امیر عرف میرو ہلاک ہوگیا۔

ترجمان سی سی ڈی جہلم کے مطابق تھانہ دینہ حدود میں مخبر کی اطلاع پر سی سی ڈی ٹیم نے چھاپہ مار کارروائی کی تو خطرناک اشتہاری مجرمان نے پولیس پارٹی پر فائرنگ شروع کر دی۔ فائرنگ کے دوران ایک گولی پولیس کانسٹیبل کے بلٹ پروف ہیلمٹ پر لگی، تاہم خوش قسمتی سے کانسٹیبل محفوظ رہا۔

ترجمان کا کہنا ہےکہ اشتہاری مجرمان فائرنگ کے بعد تین پورہ روڈ کی جانب فرار ہوئے جن کا سی سی ڈی ٹیم نے فوری تعاقب کیا۔ جوابی کارروائی کے دوران ایک اشتہاری مجرم امیر عرف میرو ولد ثمر گل سکنہ پنڈ گوندل ٹیکسلا اپنے ہی ساتھیوں کی فائرنگ سے شدید زخمی ہو گیا۔ زخمی مجرم کو فوری طور پر ہسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گیا۔

ترجمان سی سی ڈی کے مطابق ہلاک ہونے والا اشتہاری مجرم اغواء، اقدام قتل، ڈکیتی، پولیس پر مزاحمت اور دیگر سنگین مقدمات میں ریکارڈ یافتہ تھا۔ اس کے قبضے سے اسلحہ اور موٹر سائیکل بھی برآمد کر لی گئی ہے۔ ہلاک مجرم امیر عرف میرو 4 جولائی کو سی سی ڈی راولپنڈی کی حراست سے فرار ہوا تھا۔

ترجمان کا مزید کہنا ہے کہ فائرنگ کے واقعے کے بعد فرار ہونے والے دیگر مجرمان کی تلاش کے لیے سرچ آپریشن جاری ہے۔