پنڈدادنخان: مین بازار پنڈدادنخان میں جاری بیوٹیفکیشن پراجیکٹ شہریوں اور تاجروں کے لیے شدید مشکلات کا باعث بن گیا ہے، جہاں کیچڑ، گندگی اور سست روی نے صورتحال کو مزید خراب کر دیا ہے۔
سڑک پر کیچڑ اور اطراف میں کھڑی ریڑھیوں کے باعث آمدورفت بری طرح متاثر ہو رہی ہے، جبکہ حالیہ بارشوں کے بعد حالات مزید ابتر ہو گئے ہیں۔ شہریوں کو بازار سے گزرنے میں دشواری کا سامنا ہے، خصوصاً خواتین، بزرگوں اور خریداروں کے لیے مشکلات بڑھ گئی ہیں۔
تاجر برادری کا کہنا ہے کہ کاروبار شدید متاثر ہو رہا ہے اور گاہکوں کی آمد میں واضح کمی واقع ہوئی ہے۔ دوسری جانب تعمیراتی کام کی سست رفتاری مسائل میں مزید اضافے کا سبب بن رہی ہے۔
شہریوں نے صفائی ستھرائی کے ناقص انتظامات پر بھی تشویش کا اظہار کیا ہے، جس کے باعث کیچڑ اور گندگی میں اضافہ ہو رہا ہے اور بیماریوں کے پھیلنے کا خدشہ پیدا ہو گیا ہے۔
اہلیان علاقہ اور تاجروں نے ارباب اختیار سے مطالبہ کیا ہے کہ فوری نوٹس لیتے ہوئے تعمیراتی کام کو جلد مکمل کیا جائے، متبادل راستوں کا بندوبست کیا جائے اور صفائی کے مؤثر انتظامات کیے جائیں تاکہ شہریوں کو درپیش مشکلات کا ازالہ ہو سکے۔
