جہلم کے ایک اور بہادر سپوت نے مادرِ وطن پر جان نچھاور کر دی، شہید کو پورے فوجی اعزاز کے ساتھ سپرد خاک کر دیا گیا۔
تفصیلات کے مطابق شہیدوں اور غازیوں کی دھرتی جہلم کا ایک اور سپوت وطن پر قربان ہو گیا۔ لانس نائیک عمران علی بلوچستان میں دہشت گردوں کے حملے کے دوران شہید ہوئے۔
لانس نائیک عمران علی 18 ستمبر کو گوادر سے تربت جا رہے تھے کہ گھات لگائے دہشت گردوں نے بارود سے بھری گاڑی سیکیورٹی فورسز کے قافلے سے ٹکرا دی، جس کے نتیجے میں تین جوان شہید اور چار زخمی ہوئے۔ شہید عمران علی ان میں شامل تھے۔
@jhelumupdates جہلم کا بہادر سپوت لانس نائیک عمران علی شہید… ماں اور بہنوں کا سہارا وطن پر قربان #JhelumUpdates #LatestNews #fyp #breakingnews #foryoupagе #viralvideos ♬ original sound – Jhelum Updates
شہید کے والد بچپن ہی میں وفات پا گئے تھے جبکہ وہ اپنی والدہ اور تین بہنوں کے اکلوتے سہارا تھے۔ شہید عمران علی کی شادی صرف چار ماہ قبل ہوئی تھی۔ وہ چند روز قبل ہی چھٹی گزار کر دوبارہ فرائض کی انجام دہی کے لیے بلوچستان گئے تھے۔
شہید عمران علی کی نمازِ جنازہ جہلم کے علاقے ڈھوک وہاب دین میں ادا کی گئی جس میں اعلیٰ فوجی افسران، شہریوں اور اہلِ علاقہ کی بڑی تعداد نے شرکت کی۔ شہید کو مکمل فوجی اعزاز کے ساتھ مقامی قبرستان میں سپردِ خاک کیا گیا۔
اس موقع پر فوجی افسران نے شہید کی قبر پر پھولوں کی چادریں چڑھائیں اور ان کی لازوال قربانی کو سلامِ عقیدت پیش کیا۔
شہریوں اور شرکاء نے کہا کہ لانس نائیک عمران علی کی قربانی مادرِ وطن کے دفاع کے عزم کی عکاسی کرتی ہے اور پوری قوم ان کے خاندان کے غم میں شریک ہے۔
