جہلم: میونسپل کارپوریشن اور ضلعی انتظامیہ تجاوزات مافیا کے سامنے بے بس۔ اقبال لائبریری روڈ، نیا بازار، مین بازار، کناری بازار، دلہن بازار، تحصیل روڈ، سول لائن روڈ، ریلوے روڈ سمیت شہری حدود کی سڑکیں بھی سکڑ گئیں، کرپٹ عناصر کے تجاوزات مافیا سے روابطہ ہونے کا بھی انکشاف ہوا ہے۔
تفصیلات کے مطابق شہر بھر میں تجاوزات مافیا مضبوط اور با اثر ہو چکا ہے۔ شہر میں تجاوزات مافیا نے شہریوں کو ذہنی اذیت میں مبتلا کرکے رکھ دیا ہے۔ دکانداروں نے اپنی دکانوں کے آگے کئی کئی فٹ تک تجاوزات قائم کروا رکھی ہیں۔
دکانداروں نے اپنی دکانوں کے باہر والا حصہ کرایوں پر چڑھا رکھا ہے جس سے دکاندار اپنی دکانوں کا کرایہ بھی تجاوزات کرنے والے دکانداروں سے پورا کرلیتے ہیں اور دکانوں کے آگے نمائش کر کے سڑکوں پر قبضہ کرنے والوں نے جنگل کا قانون نافذ کررکھا ہے اور شہری اس خوفناک تجاوزات کی صورتحال سے ذہنی اذیت کا شکار ہو رہے ہیں۔
بیشتر واقعات میں شہری ٹریفک کا بہاؤ رکنے پر آپس میں لڑائی جھگڑے سے دوچار ہو جاتے ہیں۔ آپس میں لڑائیاں اور چوراہوں میں مستقل ریڑھی بانوں کے قیام سے ٹریفک کی روانی متاثر ہوتی ہے۔
علاوہ ازیں چیف آفیسر میونسپل کمیٹی کا شعبہ انسدادِ تجاوزات اور ٹریفک پولیس اس سلسلے میں مستقل انتظامات کرنے میں بری طرح ناکام دکھائی دیتے ہیں۔ شہریوں نے ارباب اختیارسے نوٹس لینے اور تجاوزات ختم کرنے کا مطالبہ کیاہے۔
