جہلم: وزیراعلیٰ پنجاب مریم نواز شریف کے ویژن اور ڈپٹی کمشنر جہلم میر رضا اوزگن کی ہدایت پر ڈسٹرکٹ فوڈ کنٹرولر جہلم شمس عباس نے سستے آٹے کی بلا تعطل فراہمی کو یقینی بنانے کے لیے مختلف سٹوروں کے دورے کیے۔
دوروں کے دوران آٹے کے سٹاک، دستیابی اور مقررہ سرکاری نرخ پر فروخت کا تفصیلی جائزہ لیا گیا تاکہ شہریوں کو بغیر کسی رکاوٹ کے آٹا فراہم کیا جا سکے اور کسی بھی ممکنہ قلت یا بے ضابطگی کو فوری طور پر روکا جا سکے۔
ڈسٹرکٹ فوڈ کنٹرولر نے متعلقہ عملے کو ہدایت کی کہ آٹے کی سپلائی ہر صورت برقرار رکھی جائے اور تقسیم کے نظام کو مزید مؤثر بنایا جائے تاکہ عوام کو ریلیف فراہم کیا جا سکے۔
انہوں نے واضح کیا کہ آٹے کی فراہمی میں کسی قسم کی غفلت یا بے ضابطگی برداشت نہیں کی جائے گی اور خلاف ورزی کی صورت میں ذمہ داران کے خلاف سخت کارروائی عمل میں لائی جائے گی۔
انہوں نے مزید کہا کہ اس عمل کی مسلسل نگرانی کو یقینی بنایا جا رہا ہے تاکہ شہریوں کو بنیادی اشیائے ضروریہ کی فراہمی میں کسی مشکل کا سامنا نہ ہو۔
