سوہاوہ شہر میں بسم اللہ چنگ چی شوروم کے قریب موٹرسائیکلوں کے ایک شوروم میں اچانک آگ بھڑک اٹھی، جس نے دیکھتے ہی دیکھتے شوروم کو اپنی لپیٹ میں لے لیا۔ آتشزدگی کے نتیجے میں شوروم میں کھڑی متعدد موٹرسائیکلیں اور قیمتی سامان جل کر خاکستر ہوگیا، جس کے باعث شوروم مالکان کو لاکھوں روپے کے نقصان کا سامنا کرنا پڑا۔ تاہم حادثے میں کسی قسم کا جانی نقصان نہیں ہوا۔
تفصیلات کے مطابق جہلم کی تحصیل سوہاوہ میں موٹرسائیکلوں کے شوروم میں صبح کے وقت اچانک آگ بھڑک اٹھی۔ ابتدائی معلومات کے مطابق آگ مبینہ طور پر الیکٹرک شارٹ سرکٹ کے باعث لگی، تاہم آتشزدگی کی حتمی وجہ کا تعین متعلقہ اداروں کی تحقیقات کے بعد ہی ہوسکے گا۔
اطلاعات کے مطابق شوروم کے مالک کو صبح 5 بج کر 15 منٹ پر آگ لگنے کا علم ہوا، جبکہ ریسکیو کنٹرول جہلم کو صبح 5 بج کر 46 منٹ پر واقعے کی اطلاع موصول ہوئی۔ اطلاع ملتے ہی ریسکیو کنٹرول جہلم نے فوری کارروائی کرتے ہوئے سوہاوہ سے ایک ایمبولینس جبکہ جہلم اور گوجر خان سے ایک، ایک فائر وہیکل جائے وقوعہ کی جانب روانہ کی۔
ریسکیو ٹیموں نے موقع پر پہنچ کر کارروائی شروع کی اور آگ پر مکمل قابو پالیا، جس کے باعث مزید نقصان سے بچاؤ ممکن ہوسکا۔ حادثے میں کسی قسم کا جانی نقصان نہیں ہوا۔
آگ لگنے کی اطلاع ملتے ہی اہل علاقہ کی بڑی تعداد بھی موقع پر جمع ہوگئی اور اپنی مدد آپ کے تحت آگ بجھانے کی کوششیں شروع کردیں۔ مقامی شہریوں نے اس موقع پر شدید احتجاج کرتے ہوئے کہا کہ سوہاوہ میں ریسکیو 1122 کا دفتر موجود ہونے کے باوجود فائر بریگیڈ کی مستقل اور فعال سہولت موجود نہیں۔
شہریوں کے مطابق آگ لگنے کے تقریباً ڈیڑھ گھنٹے بعد فائر بریگیڈ کی گاڑی موقع پر پہنچی، جبکہ اس وقت تک شوروم میں موجود قیمتی سامان اور موٹرسائیکلیں جل چکی تھیں۔ شہریوں کا کہنا تھا کہ اگر سوہاوہ میں فائر بریگیڈ کی مستقل سہولت موجود ہو تو کسی بھی ہنگامی صورتحال میں فوری کارروائی کے ذریعے قیمتی جان و مال کے نقصان کو کم کیا جاسکتا ہے۔
شہریوں نے اعلیٰ حکام سے مطالبہ کیا ہے کہ سوہاوہ میں فائر بریگیڈ کی مستقل اور فعال سہولت فوری طور پر فراہم کی جائے تاکہ آئندہ کسی بھی ہنگامی صورتحال میں بروقت امدادی کارروائی ممکن بنائی جاسکے اور قیمتی جان و مال کے نقصان سے بچا جا سکے۔
