جہلم میں دودھ، دہی، پھل اور سبزیوں کی قیمتوں میں ہوشربا اضافہ، شہری پریشان

جہلم شہر اور گردونواح میں دودھ، دہی، پھلوں اور سبزیوں کی قیمتوں میں ایک بار پھر من مانی اضافہ کر دیا گیا، جس سے شہری شدید مشکلات کا شکار ہو گئے ہیں۔

دودھ فی لیٹر سرکاری ریٹ 180 روپے کے بجائے 200 روپے جبکہ دہی 195 کے بجائے 200 روپے فی کلو فروخت ہو رہا ہے۔ پیاز کی سرکاری قیمت 70 روپے فی کلو مقرر ہے مگر مارکیٹ میں یہ 200 روپے فی کلو تک جا پہنچی ہے جبکہ گلی محلوں کے دکاندار اسے 120 روپے کلو فروخت کر رہے ہیں۔

اسی طرح ٹماٹر 140 کے بجائے 200 روپے فی کلو، ادرک 490 کے بجائے 550 روپے فی کلو، سبز مرچ 125 کے بجائے 200 روپے فی کلو دستیاب ہیں۔ آلو 60 روپے کے بجائے 90 روپے، کریلا 170 کے بجائے 220 روپے اور پالک 50 روپے فی گڈی کے بجائے 70 روپے میں فروخت ہو رہی ہے۔

شہریوں نے شکایت کرتے ہوئے کہا کہ سبزی وفروٹ منڈی میں قیمتیں سرکاری نرخنامے کے برعکس وصول کی جا رہی ہیں اور متعلقہ انتظامیہ غائب نظر آتی ہے۔

شہریوں نے ڈپٹی کمشنر جہلم سے فوری نوٹس لینے اور قیمتوں کو کنٹرول کرنے کا مطالبہ کیا ہے۔