جہلم میں بھتیجے نے چھریاں مار کر چچا کو قتل کر دیا، ملزم گرفتار

جہلم میں بھتیجے کے ہاتھوں چچا کا بہیمانہ قتل، پولیس نے ملزم کو آلہ قتل سمیت گرفتار کر لیا۔

تفصیلات کے مطابق جہلم میں تھانہ سول لائن کے علاقے عباس پورہ میں ایک افسوسناک واقعہ پیش آیا، جہاں بھتیجے نے اپنے چچا کو چھریوں کے وار کرکے قتل کر دیا۔

جہلم کے علاقے عباس پورہ میں افتخار عرف افی نامی نوجوان اپنی بہن سے گھریلو تنازع پر جھگڑ رہا تھا کہ چچا خلیل احمد نے اسے جھگڑا ختم کرنے اور معاملات کو سلجھانے کی تلقین کی، جس پر ملزم طیش میں آگیا اور انتہائی قدم اٹھاتے ہوئے چچا پر چھریوں کے وار کر دیے، جس سے وہ شدید زخمی ہو گئے اور موقع پر ہی دم توڑ گئے۔

واقعے کی اطلاع ملتے ہی پولیس فوری طور پر موقع پر پہنچی اور ملزم افتخار عرف افی کو آلہ قتل سمیت گرفتار کر لیا جبکہ مقتول خلیل احمد کی لاش کو پوسٹ مارٹم کے لیے ڈی ایچ کیو اسپتال جہلم منتقل کر دیا گیا۔

پولیس حکام کے مطابق کرائم سین یونٹ نے جائے وقوعہ سے شواہد اکھٹے کر لیے ہیں اور مزید تفتیش جاری ہے۔

پولیس کا کہنا ہے کہ واقعے کے اصل محرکات جاننے کے لیے مزید تحقیقات کی جا رہی ہیں اور ملزم کو قانونی کارروائی کے بعد عدالت میں پیش کیا جائے گا۔