جہلم: صیہونی ریاست اسرائیل عا لمی دہشت گرد ہے، ملکی سلامتی کےلئےہمارے اداروں کا کردار قابل تحسین ہے۔
ان خیالات کا اظہار مرکزی علماء کونسل جہلم کے صدر حکیم قاری شبیر احمد عثمانی اور دیگر عہدیداران نے ایک خصوصی اجلاس میں گفتگو کرتے ہوئے کیا۔ انہوں نے اسرائیل کو عالمی دہشت گرد ریاست قرار دیا اور عالمی برادری سے مطالبہ کیا کہ وہ اسرائیلی مظالم کے خلاف فوری اور مؤثر اقدامات کرے۔
اجلاس سے خطاب کرتے ہوئے علماء نے کہا کہ اسرائیل کی جانب سے فلسطینی عوام پر ظلم و بربریت ناقابلِ برداشت ہے، اور عالمی برادری کی خاموشی اس ظلم میں شراکت کے مترادف ہے۔ اسرائیل ایک منظم انداز میں انسانی حقوق کی سنگین خلاف ورزیاں کر رہا ہے جسے دنیا کے ہر ذی شعور فرد کو مسترد کرنا چاہیے۔
اجلاس میں ملک کے اندر حالیہ دہشت گرد کارروائیوں، بالخصوص سانحہ جعفر ایکسپریس اور سیکیورٹی فورسز کے خلاف حملوں کی شدید مذمت کی گئی۔ علماء کرام نے کہا کہ دہشت گردی میں ملوث عناصر دراصل خارجی سوچ کے حامل بزدل لوگ ہیں، جو ملک کے امن کو سبوتاژ کرنا چاہتے ہیں۔
علماء کرام کی مسلسل ٹارگٹ کلنگ اور شہادتوں پر گہرے رنج و غم کا اظہار کرتے ہوئے مرکزی علماء کونسل نے ریاستی اداروں سے مطالبہ کیا کہ وہ علماء کی جان و مال کے تحفظ کو یقینی بنانے کے لیے فوری اور مؤثر اقدامات کریں۔
اجلاس کے اختتام پر علماء نے ملکی سلامتی کے تحفظ کے لیے سیکیورٹی اداروں کے کردار کو خراج تحسین پیش کیا اور یقین دہانی کرائی کہ مرکزی علماء کونسل ہر موقع پر ریاستی اداروں کے ساتھ بھرپور تعاون جاری رکھے گی۔
