جہلم پولیس کے ضلع بھر میں 13 سرچ آپریشنز کرتے ہوئے 3 اشتہاری مجرمان اور غیر قانونی طور پر مقیم افغان شہری کو گرفتار کر لیا۔
ترجمان جہلم پولیس کے مطابق ڈسٹرکٹ پولیس آفیسر جہلم شفیق احمد چوہدری کی ہدایت پر ضلع بھر میں جرائم پیشہ عناصر کے خلاف سرچ آپریشنز کا سلسلہ جاری ہے۔ اس سلسلے میں ضلع کے مختلف علاقوں میں 13 سرچ آپریشنز کیے گئے، جن کے دوران 453 افراد، 149 گھروں اور 26 ہوٹلز و بس اسٹینڈز کو چیک کیا گیا۔
ترجمان کے مطابق سرچ آپریشنز کے دوران تھانہ سٹی، تھانہ ڈومیلی اور تھانہ پنڈ دادن خان کی حدود سے 3 اشتہاری مجرمان سمیت ایک غیر قانونی طور پر مقیم افغان شہری کو گرفتار کر لیا گیا۔
جہلم پولیس نے شہریوں سے اپیل کی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک شخص، غیر قانونی طور پر مقیم فرد یا جرائم پیشہ سرگرمیوں میں ملوث عناصر کے بارے میں فوری طور پر پولیس کو اطلاع دیں۔ پولیس کے مطابق بروقت اطلاع کسی بڑے جرم کی روک تھام اور معاشرے میں امن و امان کے قیام میں اہم کردار ادا کر سکتی ہے۔
شہریوں سے مزید کہا گیا ہے کہ اگر ان کے علم میں کوئی ایسا شخص آئے جو بغیر کوائف کے رہائش پذیر ہو، مشتبہ سرگرمیوں میں ملوث ہو یا قانون کی خلاف ورزی کر رہا ہو تو فوری طور پر اپنے قریبی تھانے یا پولیس ایمرجنسی ہیلپ لائن 15 پر اطلاع دیں۔
ڈی پی او جہلم شفیق احمد چوہدری کا کہنا ہے کہ شہریوں کی جان و مال کا تحفظ اور امن و امان کا قیام پولیس کی اولین ترجیح ہے، جبکہ جرائم پیشہ عناصر کے خلاف بلاامتیاز کارروائیاں جاری رکھی جائیں گی۔
