ابوظہبی: متحدہ عرب امارات کے دارالحکومت ابوظہبی میں ایک خاتون سے 10 ہزار درہم ( 7 لاکھ 64 ہزار پاکستانی روپے سے زائد) غلطی سے دوسری خاتون کے اکاونٹ میں منتقل ہو گئے جب کہ دوسری خاتون نے غلطی سے آنے والی رقم واپس کرنے سے انکار کردیا۔
میڈیارپورٹس کے مطابق خاتون کے انکار کے یہ معاملہ عدالت پہنچا، اس مقصد کے لیے ابوظہبی کی فیملی کورٹ میں متاثرہ خاتون نے مقدمہ دائر کرکے رقم کی واپسی کا مطالبہ کیا، متاثرہ خاتون نے اپنی رقم واپسی کا مطالبہ کرتے ہوئے کہا کہ وہ اپنے کسی عزیز کو 10 ہزار درہم ارسال کر رہی تھی کہ رقم کسی غلط اکاونٹ میں منتقل ہو گئی۔
متاثرہ خاتون نے عدالت کو آگاہ کیا کہ جب اکاؤنٹ ہولڈر کے بارے میں معلوم کرکے اس سے رابطہ کیا اور درخواست کی کہ غلطی سے منتقل ہونے والی رقم لوٹا دیں تو اس درخواست کے جواب مین دوسری جانب سے خاتون نے انکار کردیا ہے۔
عدالت نے مقدمے سے منسلک تمام ثبوتوں کا جائزہ لینے کے بعد فیصلہ مدعیہ کے حق میں صادر کرتے ہوئے فریق مخالف کوحکم دیا کہ وہ 10 ہزار درہم جو کہ غلطی سے اس کے اکاؤنٹ میں منتقل ہو گئے تھی وہ رقم متاثرہ خاتون کو واپس لوٹائے۔
