جہلم شہر سمیت ضلع بھر میں جعلی کرنسی نوٹوں پر بانی پاکستان قائداعظم محمد علی جناح کی تصویر کی بے حرمتی کے واقعات پر شہریوں میں شدید غم و غصہ پایا جاتا ہے۔
شہر بھر میں بڑی تعداد میں ایسے جعلی نوٹ بازار میں دستیاب ہیں جن پر قائداعظم محمد علی جناح کی تصویر نمایاں ہے۔ یہ جعلی نوٹ عموماً بچوں کو فروخت کیے جاتے ہیں جو انہیں کھیل کود کے دوران سڑکوں، گلیوں اور اسکولوں کے باہر پھینک دیتے ہیں۔ نتیجتاً قائداعظم کی تصویر والے یہ نوٹ نالیوں، گلیوں اور سڑکوں پر بکھرے نظر آتے ہیں، جہاں ان پر شہریوں کے قدم پڑنے سے ان کی شدید بے حرمتی ہوتی ہے۔
شہریوں کا کہنا ہے کہ قائداعظم جیسی عظیم قومی شخصیت کی تصویر کا اس انداز میں استعمال قومی وقار کے منافی ہے، اور اس کی روک تھام ناگزیر ہے۔
شہریوں نے حکومت سے مطالبہ کیا ہے کہ جس طرح شادی بیاہ کی تقریبات میں اصلی نوٹ نچھاور کرنے پر پابندی عائد کی گئی ہے، اسی طرز پر جعلی کرنسی نوٹوں کی چھپائی اور فروخت پر بھی سخت قانون سازی اور اس پر عملدرآمد کیا جائے۔
شہری حلقوں نے کہا کہ قائداعظم کی تصویر صرف قومی کرنسی پر ہی استعمال ہونی چاہیے تاکہ ان کی حرمت اور مقام برقرار رکھا جا سکے۔
