جہلم میں مصنوعی مہنگائی نے پنجے گاڑھ لیے، پرائس کنٹرول مجسٹریٹس گراں فروشی پر قابو پانے میں مکمل طور پر ناکام، عوام بالخصوص دیہاڑی دار طبقہ خود ساختہ مہنگائی سے بے حال، قصاب بھی چھوٹے بڑے گوشت کے من مانے نرخ وصول کرنے میں مصروف ہیں۔
گائے کے گوشت کا سرکاری ریٹ 7 سو کی بجائے قصاب 9 سو سے 1 ہزار روپے میں فی کلو فروخت کر رہے ہیں جبکہ بکرے کے گوشت کا سرکاری ریٹ 14 سو روپے فی کلو مقررہے ، قصاب 2 ہزار سے 22 سو روپے صارفین سے وصول کررہے ہیں ۔
اس طرح مرغی کے گوشت کا سرکاری ریٹ 7 سو روپے مقرر ہے مرغی کا گوشت فروخت کرنے والے دکاندار 780 روپے 7 سو 50 گرام فروخت کررہے ہیں ، جنہیں کوئی پوچھنے والا نہیں۔ من مرضی کے نرخ قصابوں نے مقرر کرکے وصولیاں شروع کررکھی ہیں۔
ضلع جہلم کے شہریوں نے ڈپٹی کمشنر کیپٹن (ر) سمیع اللہ فاروق اور ایڈوائزر صوبائی محتسب اعلیٰ پنجاب جہلم سے پرائس کنٹرول مجسٹریٹس اور قصابوں کے خلاف نوٹس لینے کا مطالبہ کرتے ہوئے کہا کہ قصابوں کو سرکاری نرخوں پر حفظانِ صحت کے اصولوں کے عین مطابق گوشت فروخت کرنے کا پابند بنایا جائے تاکہ شہری سرکاری نرخوں پر صحت مند گوشت خرید کر استعمال کر سکیں ۔
