سوہاوہ پولیس کی بڑی کامیابی: خاتون کو ہراساں کرنے کے مقدمے میں گزشتہ سال سے مطلوب اشتہاری ملزم کو گرفتار کر لیا۔
تفصیلات کے مطابق جہلم کی تحصیل سوہاوہ میں پولیس نے اہم کارروائی کرتے ہوئے سال 2024 سے خاتون کو ہراساں کرنے کے مقدمے میں مطلوب اشتہاری ملزم کو گرفتار کر لیا۔
پولیس کے مطابق ملزم مقدمہ درج ہونے کے بعد گرفتاری سے بچنے کے لیے مسلسل روپوش تھا، تاہم تھانہ سوہاوہ پولیس نے مسلسل کوششوں اور تکنیکی بنیادوں پر کی گئی چھان بین کے بعد اسے گرفتار کرنے میں کامیابی حاصل کی۔
ایس ایچ او تھانہ سوہاوہ اور ان کی ٹیم نے جدید سائنسی طریقہ کار استعمال کرتے ہوئے ملزم کو ٹریس کیا اور کارروائی کرتے ہوئے ملزم کو گرفتار کیا۔
ڈسٹرکٹ پولیس آفیسر جہلم طارق عزیز سندھو نے کارروائی کو سراہتے ہوئے کہا کہ اشتہاری اور سنگین مقدمات میں مطلوب افراد کے خلاف بھرپور کریک ڈاؤن جاری ہے۔ انہوں نے کہا کہ شہریوں کے جان و مال کے تحفظ اور خواتین کو ہراسانی سے محفوظ رکھنے کے لیے تمام تر وسائل بروئے کار لائے جا رہے ہیں۔
