پنڈدادنخان: عالمی ماحولیاتی دن کے موقع پر اسسٹنٹ کمشنر پنڈدادنخان نادیہ پروین کی زیرِ سرپرستی ایک آگاہی واک اور ریلی کا انعقاد کیا گیا۔
ریلی کا آغاز راجہ دادن خان کے تاریخی مقبرہ سے ہوا جو چوک محمدیہ تک جاری رہی۔ اس موقع پر شہریوں کی بڑی تعداد نے شرکت کی اور ماحولیاتی تحفظ کے پیغامات پر مبنی بینرز اُٹھا رکھے تھے۔
یہ ریلی راولپنڈی ویسٹ مینجمنٹ اتھارٹی کے تعاون سے نکالی گئی، جس کی قیادت اسسٹنٹ کمشنر نادیہ پروین، ویسٹ مینجمنٹ اتھارٹی کے انچارج راجہ فہد اور چیف آفیسر میونسپل کمیٹی پنڈدادنخان چوہدری ارباب عارف نے کی۔ ریلی میں مقامی سماجی اور فلاحی شخصیات، مرکزی انجمن تاجران پنڈدادنخان، اور سول سوسائٹی کے سرکردہ افراد کی بڑی تعداد نے بھرپور شرکت کی۔
شرکاء نے ماحول کی صفائی، پلاسٹک بیگز کے نقصانات، اور ذمہ دار شہری بننے سے متعلق بینرز اور پلے کارڈز اٹھا رکھے تھے۔ ریلی سے قبل ویسٹ مینجمنٹ اتھارٹی کے عملے نے ریلی کے روٹ پر سڑکوں کو شیشے کی طرح صاف کیا، جس سے ماحولیاتی پیغام کو مزید مؤثر انداز میں اجاگر کیا گیا۔
ریلی کا بنیادی مقصد عوام کو اس بات کا شعور دینا تھا کہ وہ گھریلو کوڑا کرکٹ گلیوں اور نالیوں میں پھینکنے کے بجائے ویسٹ کنٹینرز میں ڈالیں تاکہ صفائی عملہ بروقت صفائی ممکن بنا سکے۔
عید الاضحی کے تناظر میں انتظامیہ نے قربانی کے بعد پیدا ہونے والے فضلے کو مؤثر انداز میں ٹھکانے لگانے کے لیے بھی خصوصی اقدامات کیے ہیں۔ جانوروں کی آلائشیں اٹھانے کے لیے ایک خصوصی اسکواڈ تشکیل دے دیا گیا ہے جبکہ شکایات کے فوری ازالے کے لیے علامہ اقبال پبلک پارک پنڈدادنخان میں ایک کنٹرول روم قائم کیا جائے گا۔
شہریوں سے اپیل کی گئی ہے کہ اگر کسی جگہ عملے کی غفلت یا تاخیر دیکھیں تو فوری طور پر اطلاع دیں تاکہ صفائی میں بہتری لائی جا سکے۔
