جہلم: ڈی پی او جہلم شفیق احمد چوہدری نے سیف سٹی جہلم کا دورہ کیا، جہاں انہوں نے سکیورٹی صورتحال، کیمروں کے ذریعے نگرانی اور پولیس رسپانس کے نظام کا تفصیلی جائزہ لیا۔
دورانِ دورہ ڈی پی او نے سیف سٹی کے کنٹرول روم میں مختلف علاقوں کی کیمروں کے ذریعے نگرانی، اہم مقامات کی سکیورٹی اور کسی بھی ہنگامی صورتحال میں پولیس کے فوری رسپانس کے نظام کا معائنہ کیا۔
ڈی پی او شفیق احمد چوہدری نے متعلقہ اہلکاروں کو ہدایت کی کہ سیف سٹی کیمروں کے ذریعے مشکوک سرگرمیوں اور جرائم پیشہ عناصر کی مؤثر نگرانی کو یقینی بنایا جائے۔ انہوں نے کہا کہ کسی بھی ہنگامی صورتحال میں فوری پولیس رسپانس کو مزید مؤثر بنایا جائے جبکہ کیمروں کی مانیٹرنگ میں کسی قسم کی غفلت ہرگز نہ برتی جائے۔
انہوں نے مزید ہدایت کی کہ جدید ٹیکنالوجی اور سیف سٹی مانیٹرنگ نظام کو جرائم کی روک تھام، جرائم پیشہ عناصر کی نشاندہی اور شہریوں کے جان و مال کے تحفظ کے لیے بھرپور انداز میں استعمال کیا جائے۔
ڈی پی او جہلم نے کہا کہ سیف سٹی کیمروں کی موثر مانیٹرنگ، بروقت پولیس رسپانس اور جدید ٹیکنالوجی کا درست استعمال جرائم کی روک تھام میں اہم کردار ادا کر رہا ہے۔ انہوں نے متعلقہ افسران کو مانیٹرنگ کے نظام کو مزید بہتر بنانے اور دستیاب وسائل کو مؤثر انداز میں بروئے کار لانے کی ہدایت کی۔
شفیق احمد چوہدری نے کہا کہ شہریوں کے جان و مال کا تحفظ اور ضلع بھر میں موثر سکیورٹی و نگرانی کو یقینی بنانا پولیس کی اولین ترجیح ہے، جس کے لیے تمام ممکنہ اقدامات جاری رکھے جائیں گے۔
