دینہ: یومِ استحصال کشمیر کے موقع پر دینہ میں اسسٹنٹ کمشنر صفاء عابد کی قیادت میں ریلی کا انعقاد کیا گیا، جس میں ریسکیو 1122، پولیس اہلکاروں، سول سوسائٹی کے افراد اور شہریوں کی کثیر تعداد نے شرکت کی۔
ریلی کے دوران ایک منٹ کی خاموشی اختیار کی گئی اور ٹریفک کو عارضی طور پر روک کر کشمیری شہداء کو خراج عقیدت پیش کیا گیا۔
ریلی سے خطاب کرتے ہوئے اسسٹنٹ کمشنر دینہ صفاء عابد نے کہا کہ 5 اگست یومِ استحصال کشمیر تاریخ کا سیاہ ترین دن ہے جب بھارت نے یکطرفہ طور پر کشمیر کی خصوصی حیثیت ختم کر کے ایک ناقابلِ معافی جرم کیا۔
انہوں نے کہا کہ پاکستان کا ہر شہری کشمیریوں کے ساتھ سیسہ پلائی دیوار کی طرح کھڑا ہے، بھارتی ریاستی دہشت گردی کی شدید الفاظ میں مذمت کرتے ہیں اور بہادر کشمیری عوام کی قربانیوں کو سلام پیش کرتے ہیں۔
تقریب میں چیف آفیسر میونسپل کمیٹی دینہ محمد فیصل، ایم او آئی سہیل اشرف، معروف سیاسی شخصیات راجہ افراسیاب، راجہ مبارک کیانی، ریحان علی عنصر، تجاوزات انسپکٹر عدیل بٹ، ہیڈ کلرک میاں سہیل سمیت دیگر افراد نے شرکت کی۔
راجہ افراسیاب اور راجہ مبارک کیانی نے بھی اپنے خطاب میں بھارت کی ریاستی دہشت گردی کی پرزور مذمت کرتے ہوئے کہا کہ کشمیر کے بہادر عوام نے ظلم اور جبر کے سامنے جھکنے سے انکار کر کے دنیا کو پیغام دیا ہے کہ آزادی کی تحریک کو طاقت کے زور پر دبایا نہیں جا سکتا۔ انہوں نے کہا کہ پاکستانی قوم ہمیشہ کشمیری بھائیوں کے ساتھ کھڑی ہے اور ان کی قربانیوں کو سلام پیش کرتی ہے۔
شرکاء نے کشمیر کی آزادی کے حق میں نعرے بازی بھی کی اور بھارتی مظالم کے خلاف شدید احتجاج کیا۔
