سوہاوہ: میاں نواز شریف کی پاکستان آمد پر ان کے استقبال کی تیاریوں کے سلسلہ میں سوہاوہ میں ورکرز کنونشن کا انعقاد کیا گیا۔
تفصیلات کے مطابق پاکستان مسلم لیگ (ن) کے سابق ایم پی اے اور پارلیمانی سیکرٹری راجہ اویس خالد کی صدارت میں ورکرز کنونشن کا انعقاد ان کی رہائش گاہ پر کیا گیا۔ کنونشن میں لیگی کارکنان کی بڑی تعداد نے شرکت کی اور میاں نواز شریف کی آمد پر پرتپاک استقبال میں شرکت کو یقینی بنانے کی یقین دہانی کروائی۔
سابق ایم پی اے راجہ اویس خالد نے خطاب کرتے ہوئے کہا کہ میاں نواز شریف ہی ملک کو بحرانوں سے نکالنے کی صلاحیت رکھتے ہیں، وہ چوتھی بار پاکستان کے وزیراعظم بن کر ملک کو دوبارہ ترقی کی راہ پر گامزن کریں گے۔
انہوں نے سابق وزیراعظم پاکستان پر تنقید کرتے ہوئے کہا کہ عمران خان نے نوجوان نسل کو غلط راہ پر گامزن کیا، عمران خان نے نوجوان نسل کو ملکی سالمیت اور اداروں کے خلاف اکسایا۔
راجہ اویس خالد نے کہا کہ سوہاوہ کو دوبارہ مسلم لیگ کا قلعہ ثابت کریں گے اور آئندہ الیکشن میں بھی اس بار جیت کر سوہاوہ کی محرومیوں کا ازالہ کیا جائے گا۔
یاد رہے کہ سابق ممبر صوبائی اسمبلی راجہ اویس خالد سابق وزیراعظم میاں نواز شریف کے والہانہ استقبال کے لیے سوہاوہ سے قافلے کی قیادت کریں گے۔
