جہلم: پولیس نے بوگس چیک کے مقدمہ میں مطلوب ایک اشتہاری مجرم کو گرفتار کر لیا۔
تفصیلات کے مطابق جہلم کے تھانہ سٹی کے ایس ایچ او اور ان کی ٹیم نے خفیہ معلومات اور جدید سائنٹیفک طریقہ کار کو بروئے کار لاتے ہوئے کامیاب کارروائی کی اور طویل عرصہ سے روپوش مجرم کو ٹریس کر کے گرفتار کر لیا۔
پولیس کے مطابق گرفتار مجرم تھانہ سٹی میں درج بوگس چیک کے مقدمہ میں مطلوب تھا اور گرفتاری سے بچنے کے لیے مسلسل روپوش رہا۔ تھانہ سٹی پولیس نے پیشہ ورانہ مہارت، جدید ٹیکنالوجی اور مسلسل نگرانی کے ذریعے مجرم کی لوکیشن معلوم کی اور اسے قانون کے کٹہرے میں لا کر انصاف کے تقاضے پورے کیے۔
اس موقع پر ڈسٹرکٹ پولیس آفیسر طارق عزیز سندھو نے کہا کہ اشتہاری اور مفرور مجرمان کے خلاف بھرپور کریک ڈاؤن جاری ہے اور عوام کے جان و مال کے تحفظ کے لیے کسی قسم کی رعایت نہیں برتی جائے گی۔ انہوں نے واضح کیا کہ بوگس چیک، فراڈ اور مالی جرائم میں ملوث عناصر قانون کی گرفت سے نہیں بچ سکتے۔
ڈی پی او جہلم نے تھانہ سٹی پولیس ٹیم کی کارکردگی کو سراہتے ہوئے ہدایت کی کہ مجرم کو ٹھوس شواہد کے ساتھ عدالت میں پیش کیا جائے تاکہ اسے قرار واقعی سزا دلوائی جا سکے۔ انہوں نے شہریوں سے بھی اپیل کی کہ وہ مشکوک سرگرمیوں کی فوری اطلاع پولیس کو دیں تاکہ جرائم کے خاتمے میں موثر کردار ادا کیا جا سکے۔
