جہلم: ریسکیو 1122 جہلم نے ماہ اکتوبر 2025 کے دوران مجموعی طور پر 2511 افراد کو ریسکیو کیا، جبکہ مختلف ایمرجنسیز میں 87 افراد جاں بحق ہوئے۔
یہ رپورٹ ڈسٹرکٹ ایمرجنسی آفیسر ریسکیو 1122 جہلم انجینئر سعید احمد کی زیر صدارت اجلاس میں جاری کی گئی، جس کے مطابق ریسکیو 1122 جہلم نے ماہ اکتوبر کے دوران مختلف ایمرجنسیز میں بروقت رسپانس کرتے ہوئے 2511 افراد کو ریسکیو کیا جبکہ 1383 مریضوں کو ابتدائی طبی امداد فراہم کرنے کے بعد ہسپتال منتقل کیا گیا۔
رپورٹ کے مطابق ماہ اکتوبر میں ریسکیو 1122 کی ہیلپ لائن پر 11747 کالز موصول ہوئیں جن میں سے 2548 ایمرجنسی کالز تھیں۔ ان ایمرجنسیز میں 423 روڈ ٹریفک حادثات، 1732 میڈیکل ایمرجنسیز، 18 آگ لگنے کے واقعات، 32 کرائم کیسز، ایک عمارت گرنے، 2 ڈوبنے کے واقعات اور 340 متفرق ایمرجنسیز شامل تھیں۔
ڈسٹرکٹ ایمرجنسی آفیسر کے مطابق ماہ اکتوبر میں 87 افراد مختلف ایمرجنسیز میں جاں بحق ہوئے، جن میں زیادہ تر میڈیکل ایمرجنسیز کے کیسز شامل تھے۔ ریسکیو 1122 جہلم نے اپنی بہترین کارکردگی کی روایت برقرار رکھتے ہوئے اوسط رسپانس ٹائم 7.9 منٹ میں متاثرہ افراد کو ریسکیو کیا۔
کمیونٹی سیفٹی پروگرام کے تحت ریسکیو 1122 نے اکتوبر کے دوران مختلف اداروں میں فرسٹ ایڈ اور فائر سیفٹی ٹریننگز کا انعقاد کیا جبکہ یونین کونسل سطح پر کمیونٹی ایمرجنسی ریسپانس ٹیموں کی تشکیل اور سکاوٹس کے لیے CADRE ٹریننگ بھی جاری ہے۔
مزید برآں پیشنٹ ٹرانسفر سروس کے تحت جہلم سے 98 مریضوں کو راولپنڈی، اسلام آباد اور سرگودھا کے ہسپتالوں میں منتقل کیا گیا تاکہ انہیں بہتر طبی سہولیات فراہم کی جا سکیں۔
ڈسٹرکٹ ایمرجنسی آفیسر انجینئر سعید احمد نے ریسکیورز کی کارکردگی کو حوصلہ افزا قرار دیتے ہوئے کہا کہ ریسکیو 1122 جہلم کی ٹیم ہمہ وقت عوام کی خدمت کے لیے تیار ہے اور کسی بھی ناگہانی صورتحال میں بروقت اور مؤثر خدمات فراہم کر رہی ہے۔
