جہلم: ڈپٹی کمشنر سیدہ رملہ علی نے کہا ہے کہ جہلم شہر کے نشیبی علاقوں میں سیوریج سسٹم بچھا کر نکاسی آب کا مسئلہ حل کریں گے، آئندہ چند روز میں سیوریج سسٹم پر کام شروع ہو جائے گا۔
یہ بات ڈپٹی کمشنر جہلم سیدہ رملہ علی نے ایڈمنسٹریٹر میونسپل کمیٹی اور میونسپل افسران سے گفتگو کرتے ہوئے کہی۔ ڈپٹی کمشنر نے میونسپل افسران کو ہدایت کی کہ حکومت پنجاب کی جانب سے کروڑوں روپے کے فنڈز جاری کئے جارہے ہیں تاکہ نشیبی علاقوں میں سیوریج کا مسئلہ حل کیا جا سکے۔
انہوں نے کہا کہ مدینہ ٹاؤن، کریم پور، ڈھوک فردوس میں نئی سیوریج لائنوں کو بچھانے کے کام کی مکمل طور پر نگرانی کرتے ہوئے معیاری کام ہونا چاہئے تاکہ نکاسی آب کے مسائل حل ہو سکیں۔
