جہلم میں پرائس کنٹرول مجسٹریٹس کی عدم دلچسپی کے باعث شہر اور گردونواح میں سبزیوں، پھلوں اور گوشت کے نرخ آسمان کو چھونے لگے۔
روزمرہ استعمال کی اشیاء کی قیمتوں میں غیر معمولی اضافے نے غریب اور سفید پوش طبقے کی زندگی اجیرن بنا دی ہے جبکہ بنیادی ضروریات کی خریداری عوام کی دسترس سے کوسوں میل دور ہو چکی ہے۔
گزشتہ کئی ہفتوں سے سبزیوں، پھلوں اور گوشت کی قیمتوں میں مسلسل اضافہ دیکھا جا رہا ہے۔ دکاندار من مانی قیمتیں وصول کر رہے ہیں جبکہ ضلع انتظامیہ کی جانب سے کوئی مؤثر کارروائی نظر نہیں آ رہی۔ شہریوں کا کہنا ہے کہ موجودہ صورتحال میں غریب خاندان اپنے بچوں کو دو وقت کی روٹی مہیا کرنے کے قابل بھی نہیں رہے۔
شہریوں نے ڈپٹی کمشنر جہلم سے مطالبہ کیا ہے کہ مہنگائی کا فوری نوٹس لیا جائے اور پرائس کنٹرول مجسٹریٹس کو ہدایت کی جائے کہ وہ روزانہ کی بنیاد پر مارکیٹ کا دورہ کریں اور دکانداروں کو سرکاری نرخنامے کے مطابق اشیاء خوردونوش فروخت کرنے کا پابند بنائیں۔
عوام کا کہنا ہے کہ اگر ضلعی انتظامیہ نے بروقت کارروائی نہ کی تو صورتحال مزید خراب ہو سکتی ہے، لہٰذا مہنگائی کے جن پر قابو پانا وقت کی اہم ضرورت ہے۔
