جہلم: جمخانہ کلب میں سہولیات کو مزید بہتر بنانے اور شہریوں کو ایک بہترین تفریح گاہ بنانے کے لیے کوششوں کی ضرورت ہے۔
یہ بات ڈپٹی کمشنر جہلم کیپٹن (ر) سمیع اللہ فاروق نے جمخانہ کلب کے بورڈ آف گورنرز کی میٹنگ سے گفتگو کرتے ہوئے کہی۔ اجلاس میں جمخانہ کلب کے لئے بجلی گیس کے نئے کنکشن اور دیگر مالیاتی امور پر تفصیلی تبادلہ خیال کیا گیا۔
ڈپٹی کمشنر جہلم کو بتایا گیا کہ اب تک چار سو کے قریب ممبرشپ ہو چکی ہے جبکہ جمخانہ کلب کے اندر سپورٹس ارینا، ہوٹل، جم کلب، آؤٹ ڈور ڈنر وغیرہ کی سہولیات مکمل طور پر شروع کی جا چکی ہیں۔
سمیع اللہ فاروق نے بورڈ آف گورنرز سے گفتگو کرتے ہوئے کہا کہ جمخانہ کلب کی تعمیر میں انتہائی تیزی سے کام جاری ہے بہت جلد جمخانہ کے باقی ماندہ کام کو بھی مکمل کر کے اسٹیٹ آف دی آرٹ جمخانہ ضلع جہلم کے شہریوں کے لیے اوپن ہو جائے گا۔
