جہلم شہر کی معروف سماجی و مذہبی شخصیت سید خلیل حسین کاظمی نے کہا ہے کہ جب مسلمان اتحاد کا مظاہرہ کرتے ہیں تو اللہ تعالیٰ ان کے دشمنوں کو ان کے قدموں میں گرا دیتا ہے۔
ان خیالات کا اظہار انہوں نے جہلم پریس کلب کے نمائندہ وفد سے خصوصی گفتگو کرتے ہوئے کیا۔ انہوں نے کہا کہ جب بھی کوئی دشمن اسلام یا پاکستان کے خلاف جارحیت کرے، تو ہمیں چاہیئے کہ ہم مسلکی اختلافات اور مکاتب فکر کی حدود سے نکل کر ایک امتِ واحدہ بن جائیں۔ دشمن چاہے عددی اور عسکری اعتبار سے جتنا بھی بڑا ہو، وہ ایمان، اتحاد اور یقین کے سامنے کھڑا نہیں ہو سکتا۔
سید خلیل حسین کاظمی نے کہا کہ ہمیں اپنی مسلح افواج پر مکمل اعتماد اور بھروسہ ہے۔ انہوں نے اس عزم کا اظہار کیا کہ جس طرح اللہ رب العزت نے پاکستان کو دفاعی استحکام عطا کیا ہے، وہ دن دور نہیں جب وطنِ عزیز معاشی استحکام بھی حاصل کرے گا۔
انہوں نے نوجوان نسل کو پیغام دیتے ہوئے کہا کہ وہ دین، وطن اور اتحاد کی طاقت کو پہچانیں اور اپنے اندر اجتماعیت، نظم و ضبط اور قربانی کا جذبہ پیدا کریں تاکہ پاکستان کو ایک مضبوط، پرامن اور خوشحال ریاست بنایا جا سکے۔
