جہلم: ریسکیو 1122 جہلم نے ماہ جنوری 2026 کے دوران بروقت اور مؤثر کارروائیاں کرتے ہوئے مجموعی طور پر 2867 افراد کو ریسکیو کیا۔
اس حوالے سے ڈسٹرکٹ ایمرجنسی آفیسر ریسکیو 1122 جہلم انجینئر سعید احمد کی صدارت میں ایک اجلاس منعقد ہوا، جس میں ادارے کی ماہانہ کارکردگی کا تفصیلی جائزہ لیا گیا۔
اجلاس میں بتایا گیا کہ ماہ جنوری میں ریسکیو 1122 کی ہیلپ لائن پر مجموعی طور پر 8761 کالز موصول ہوئیں، جن میں سے 2905 ایمرجنسی کالز تھیں۔ ان ایمرجنسی کالز پر فوری رسپانس دیتے ہوئے ریسکیو 1122 نے 2867 افراد کو موقع پر ابتدائی طبی امداد فراہم کی، جبکہ 1560 مریضوں کو مزید علاج کے لیے مختلف ہسپتالوں میں منتقل کیا گیا۔
ڈسٹرکٹ ایمرجنسی آفیسر کے مطابق ماہ جنوری میں روڈ ٹریفک حادثات کے 346 واقعات پیش آئے، جن میں 386 افراد زخمی اور 2 افراد جاں بحق ہوئے۔ اسی طرح میڈیکل ایمرجنسیز کی تعداد 2152 رہی، آگ لگنے کے 31 واقعات رپورٹ ہوئے۔
26 کرائم ایمرجنسیز جبکہ 350 متفرق نوعیت کی ایمرجنسی کالز پر بھی ریسکیو 1122 نے خدمات انجام دیں۔ ریسکیو 1122 جہلم نے اپنی بہترین روایت کو برقرار رکھتے ہوئے اوسطاً 7 اعشاریہ 7 منٹ کے اندر رسپانس دے کر متاثرہ افراد کو امداد فراہم کی۔
کمیونٹی سیفٹی پروگرام کے تحت محفوظ معاشرے کے قیام کے لیے ریسکیو 1122 جہلم کی جانب سے ماہ جنوری میں ضلع بھر کی تمام ہائی رائز عمارتوں کا فائر سیفٹی سروے کیا گیا اور مختلف مقامات پر فرضی مشقوں کا انعقاد بھی کیا گیا۔ اس کے علاوہ مختلف سرکاری و نجی اداروں، سکولوں اور کالجوں میں فرسٹ ایڈ اور فائر سیفٹی کی تربیت دی گئی، جبکہ یونین کونسل کی سطح پر کمیونٹی ایمرجنسی رسپانس ٹیموں کی تشکیل اور اسکاؤٹس کے لیے کیڈر ٹریننگ کا عمل بھی جاری رہا۔
ریسکیو 1122 کی پیشنٹ ٹرانسفر سروس کے تحت بہتر طبی سہولیات کی فراہمی کے لیے ضلع جہلم سے 101 مریضوں کو راولپنڈی، اسلام آباد اور سرگودھا کے مختلف ہسپتالوں میں منتقل کیا گیا۔
اجلاس کے اختتام پر ڈسٹرکٹ ایمرجنسی آفیسر انجینئر سعید احمد نے ریسکیورز کی مجموعی کارکردگی کو حوصلہ افزا قرار دیتے ہوئے کہا کہ تمام بلڈنگ مالکان اپنی عمارات میں فائر سیفٹی اقدامات پر سختی سے عملدرآمد یقینی بنائیں تاکہ کسی بڑے جانی و مالی نقصان سے بچا جا سکے۔
