جہلم: پٹرولیم مصنوعات کی قیمتوں میں کمی کے باوجود جہلم میں مہنگائی اور ٹرانسپورٹ کرایوں میں کوئی کمی نہ ہو سکی، جس کے باعث مسافر شدید مشکلات کا شکار ہیں۔
تفصیلات کے مطابق وفاقی حکومت کی جانب سے حالیہ دنوں میں پٹرولیم مصنوعات کی قیمتوں میں تقریباً 10 روپے فی لیٹر تک کمی کی گئی، تاہم اس کا فائدہ تاحال عوام تک منتقل نہیں ہو سکا۔ ٹرانسپورٹر کی جانب سے مبینہ طور پر مسافروں سے پرانے کرائے وصول کیے جا رہے ہیں۔
سیکرٹری ڈسٹرکٹ روڈ ٹرانسپورٹ اتھارٹی کی جانب سے بھی اب تک کرایوں میں کسی قسم کی کمی کا نوٹیفکیشن جاری نہیں کیا گیا۔ اندرونِ ضلع اور دیگر اضلاع کے لیے چلنے والی مسافر گاڑیوں کے مالکان مسافروں سے سابقہ کرایے ہی وصول کر رہے ہیں، جس پر عوام نے شدید ردِعمل کا اظہار کیا ہے۔
مسافروں نے شکوہ کیا کہ جب پٹرولیم مصنوعات میں معمولی اضافہ ہوتا ہے تو کرایوں میں فوراً اضافہ کر دیا جاتا ہے، لیکن موجودہ نمایاں کمی کے باوجود کرایوں میں کوئی رد و بدل نہیں کیا گیا۔ اسی طرح گڈز ٹرانسپورٹ کرایوں میں بھی کمی نہ ہونے کے باعث اشیائے خورونوش کی قیمتوں پر بھی کوئی مثبت اثر نہیں پڑ سکا۔
شہریوں نے مطالبہ کیا ہے کہ پٹرولیم مصنوعات کی قیمتوں میں کمی کا فائدہ براہِ راست عوام تک منتقل کیا جائے، ضلعی انتظامیہ کرایوں میں کمی کو یقینی بناتے ہوئے ٹرانسپورٹرز کے خلاف کارروائی کرے جبکہ وزیراعلیٰ پنجاب مریم نواز شریف، چیف سیکرٹری پنجاب اور سیکرٹری ٹرانسپورٹ سے اس معاملے پر نوٹس لینے کی اپیل کی گئی ہے۔
