پنڈدادنخان کے علاقے بھیلووال سے تعلق رکھنے والے قابل فخر نوجوان راجہ اسد جاوید نے محکمہ پٹرولنگ پولیس میں اپنی صلاحیتوں کا لوہا منوا لیا۔
راجہ اسد نے سال 2010 میں پنجاب ہائی وے پٹرول پولیس میں بطور کانسٹیبل ملازمت اختیار کی، اور دورانِ سروس پنجاب یونیورسٹی سے ایم اے ہسٹری کی ڈگری بھی حاصل کی۔
رواں سال پنجاب پبلک سروس کمیشن کے تحت پٹرولنگ پولیس میں اسسٹنٹ سب انسپکٹر (ASI) کی بھرتیوں کا اعلان کیا گیا، جس میں راجہ اسد جاوید نے اعلیٰ کارکردگی کا مظاہرہ کرتے ہوئے کامیابی حاصل کی اور ترقی پا کر اے ایس آئی کے عہدے پر فائز ہو گئے۔
اس شاندار کامیابی پر پٹرولنگ پولیس ضلع جہلم کے ضلعی انچارج ڈی ایس پی نعیم اختر نے پٹرولنگ پوسٹ للہ موڑ پنڈدادنخان کا خصوصی دورہ کیا اور راجہ اسد کو پھولوں کا گلدستہ پیش کر کے مبارکباد دی۔
سیاسی، سماجی اور عوامی حلقوں کی جانب سے بھی راجہ اسد جاوید کو خراجِ تحسین پیش کیا گیا ہے، جنہوں نے دیانت، محنت اور لگن کے ساتھ اپنی قابلیت کو ثابت کیا۔ راجہ اسد کی یہ کامیابی علاقے کے نوجوانوں کے لیے ایک قابل تقلید مثال ہے۔
