پی ٹی آئی اسمبلی میں عوامی مفاد کے بجائے اپنی بات کرتی ہے، بلال اظہر کیانی

کنویئر پارلیمانی ٹاسک فورس برائے ایس ڈی جیز بلال اظہر کیانی نے کہا ہے کہ پی ٹی آئی قیادت اسمبلی میں ہمیشہ اپنی سیاست کی بات کرتی ہے، انہیں عوامی دلچسپی کے امور سے کوئی سروکار نہیں۔

بلال اظہر کیانی نے اسلام آباد میں میڈیا سے گفتگو کرتے ہوئے کہا کہ پی ٹی آئی قیادت نے جھوٹ پر مبنی پریس کانفرنس کی، جس میں انہوں نے کہا کہ انہیں قومی اسمبلی اجلاس میں بولنے نہیں دیا گیا، پی ٹی آئی والے صرف اپنی سیاست کی بات کرتے ہیں اور پارلیمنٹ میں شورشرابا کرتے ہیں۔

انہوں نے کہا کہ پی ٹی آئی والوں کو اسمبلی میں بات کرنے کا بھرپور موقع دیا جاتا ہے، پارلیمنٹ میں صرف عوام ایشوز پر بات ہونی چاہیے، پی ٹی آئی رہنما اکثر اپنی سیاست کے لیے اسمبلی کارروائی کو ڈسٹرب کرتے ہیں۔

بلال اظہر کیانی نے کہا کہ آج پی ٹی آئی رہنماؤں اور اسپیکر قومی اسمبلی کے درمیان یہ طے ہوا تھا کہ وقفہ سوالات کے بعد پوائنٹ آف آرڈر پر اسد قیصر بات کریں گے، اسد قیصر کہیں چلے گئے تھے جنہوں نے بعد میں اسپیکر قومی اسمبلی کو بتایا کہ انہیں عدالت جانا پڑگیا تھا۔

ان کا کہنا تھا کہ بیرسٹر گوہر اور دوسرے پی ٹی آئی رہنما وقفہ سوالات کے دوران اسمبلی اجلاس سے باہر چلے گئے تھے، جب وقفہ سوالات مکمل ہوا تو اپنی سیاست پر بات کرنے کے لیے اجلاس میں آگئے، انہیں میں نے کہا کہ آپ کو تقریر کرنے کا موقع ملے گا مگر ایجنڈا ختم ہونے کے بعد، جس پر وہ ناراض ہوگئے۔

انہوں نے کہا کہ پی ٹی آئی رہنما عوامی ایشوز پر بات نہیں کرتے ہیں، آج بھی انہوں نے کوئی بات نہیں کی ہاں ان کا ایک ممبر ضرور کھڑا ہوا تھا، آئی ٹی کا سوال تھا مگر شیر افضل مروت نے کہا کہ انہیں سپلیمینٹری سوال پوچھنا ہے۔

’جب مائیک آن ہوا تو انہوں نے اپنے تیروں کی برسات اپنی جماعت کی طرف کی اور کہا کہ میں اپنے ساتھیوں سے پوچھنا چاہتا ہوں کہ مجھے کیوں نکالا۔‘