جہلم پولیس نے کارروائیاں کرتے ہوئے غیر قانونی طور پر پتنگیں اپنے قبضے میں رکھنے والے تین ملزمان کو گرفتار کر لیا اور بھاری تعداد میں پتنگیں برآمد کر لی گئیں۔
تفصیلات کے مطابق جہلم میں ایس ایچ او تھانہ سٹی اور ان کی ٹیم نے کارروائی کرتے ہوئے دو ملزمان کو گرفتار کیا، جو غیر قانونی طور پر پتنگیں اپنے پاس رکھے ہوئے تھے۔ پولیس کے مطابق حکومت پنجاب کی جانب سے پتنگ بازی اور پتنگ فروشی پر مکمل پابندی عائد ہے، اس کے باوجود ملزمان نے پتنگیں اپنے قبضے میں رکھ کر قانون کی خلاف ورزی کی۔
تھانہ سٹی میں دونوں ملزمان کے خلاف الگ الگ مقدمات درج کر لیے گئے ہیں جبکہ ان کے قبضے سے مجموعی طور پر 45 عدد پتنگیں برآمد کی گئی ہیں۔
دوسری جانب ایس ایچ او تھانہ کالا گجراں اور ان کی ٹیم نے بھی مؤثر کارروائی کرتے ہوئے ایک ملزم کو گرفتار کر لیا۔ ملزم غیر قانونی طور پر پتنگیں اپنے پاس رکھے ہوئے تھا اور حکومتی پابندی کی خلاف ورزی کا مرتکب پایا گیا۔ تھانہ کالا گجراں میں ملزم کے خلاف مقدمہ درج کر لیا گیا ہے جبکہ اس کے قبضے سے 50 عدد پتنگیں برآمد کی گئی ہیں۔
اس موقع پر طارق عزیز سندھو نے واضح کیا کہ پتنگ فروشی، پتنگ بازی اور اس کے نتیجے میں شہریوں کی جان و مال کو لاحق خطرات کو ہرگز برداشت نہیں کیا جائے گا۔ انہوں نے کہا کہ ایسے عناصر جو قانون شکنی کے ذریعے شہریوں کو نقصان پہنچانے کا باعث بنتے ہیں، ان کے ساتھ آہنی ہاتھوں سے نمٹا جائے گا۔
ڈی پی او جہلم کا مزید کہنا تھا کہ ضلع بھر میں پتنگ بازی کے خاتمے کے لیے کارروائیاں بلا امتیاز جاری رہیں گی اور کسی بھی ملزم کو رعایت نہیں دی جائے گی، تاکہ شہریوں کی جان و مال کا تحفظ یقینی بنایا جا سکے اور امن و امان کی فضا برقرار رہے۔
